Beijing khuaa taekwondo zir tur minister hoin thlahliam
Nimin khan Lalnghinglova Hmar, Minister of State, Sports & Youth Services Department hoin a office chamber-ah Beijing, China-a taekwondo leh Bachelor of Arts (BA) zir tura thlan mi pahnih – Vanlalhmangaihzuali d/o Lalrinawma, Kolasib New Diakkawn leh Joseph Vanlalpeka s/o Lalremruata (L), Armed Veng South-te fuihna leh thlahna hun hman a ni.
Minister chuan thu sawiin, “Mizoram sports-in hma a sawn zel theihna’n sports association hruaitute leh infiammite’n national level leh international level thleng phaka ngaihtuahna kan sen a tul” a ti a, Mizoram Amateur Taekwondo Association (MATA) hruaitute hmathlir leh hmalakna hrang hrangte lawmawm a tih thu sawiin, taekwondo chu international level-a medal hnaih theihna sports discipline zinga tel a nih thu a sawi.
Lalnghinglova Hmar chuan Zuali leh Pekate chu an university leh China rama Mizo aiawhtu leh Mizoram hmel lanna an ni dawn tih hrilhin, an zirna leh nitin nunphungah Mizo an nih hre reng tur leh Mizo nun zemawi vawng zel turin a chah.
Sawizawmin, tawng, hriselna leh zirna chungchanga harsatna an tawh chang pawhin an kal chhan hre reng a, hlawhtling ngei tura thawkrim turin a fuih a, an pahnih hian pawisa fai a pai nghal bawk.
Thlahna hunah hian MATA hruaitute’n report pein fuihna thu an sawi a; Beijing-a kal turte chu Mizoram tana kal an nih hre reng a, theihtawp chhuah turin an chah a; hmathlir thui tak nen Mizoram Sports Conclave buatsaih a, Mizo infiammite tana kawng hawnsaktu sports minister chungah lawmthu an sawi bawk.
Vanlalhmangaihzuali leh Joseph Vanlalpekate zirna tur hi Capital University of Physical Education & Sports, Beijing, China a ni a; an luhna hi foreign sponsorship quota a ni.
Kumin June ni 13-14 chhunga Aizawla Mizoram Sports Conclave buatsaih a nih tuma lo kal, Grand Master Kim Hee do leh Grand Master Lee Jeong Hee-te’n Mizoram Olympic 2036 Vision a hlawhtlinna turin he sponsorship hi an buaipui a ni.
He Sports University-a sponsorship hmuh a nih thu an hriat ve leh MATA chuan thuchhuah siam nghalin, diltu engmawzat atangin Grand Master-te’n tehfung chi hrang hrang hmangin an lo endik a, endikna hrang hrang paltlang hnuah India atangin Vanlalhmangaihi leh Joseph Vanlalpekate chu zir thei tura thlan an ni ta a ni tiin an tarlang.
University-ah hian China zirlaite kalphung ang thoin kum khat chhung chu China tawng (Mandarin) an zir ang a, chumi chhung chuan taekwondo zirtirna an kalpui tho ang a, kum khat hnuah Bachelor of Arts an zir chhunzawm ang.
India quota-a tling thei Mizo taekwondo player pahnihte hi MATA player tha tak ve ve an ni a; Kolasib New Diakkawn nula Vanlalhmangaihzuali hian Kolasib Taekwondo Club atangin taekwondo a zirchhuak a, Goa National Games leh National Senior Championship hnuhnung berah khan gold medal a la ve ve a ni.
Armed Veng South tlangval Joseph Vanlalpekhlua hi national junior champion lai niin, Mizoram tana vawi tam tak medal lo la tawhtu a ni a, Exodus School Taekwondo Club-ah Taekwondo a zir mek a ni.
Nimin chawhnu tho khan Dr. Vanlalthlana, Minister, School Education pawhin Beijing-a taekwondo zir turte lawmpuina leh fuihna thu sawiin thilpek a hlan bawk.
Inthlahna hunah hian MATA hruaitute bakah player chhungte’n infiammite hi an tawiawm a ni.
Beijing khuaa taekwondo zir tur minister hoin thlahliam
Get real time updates directly on you device, subscribe now.
Next Post