Beisei phak lo chunga chak England

Euro 2024 khelh mekah team ngaihven hlawh England chu Pathianni zan khan an inlan a, hnam huaisen Serbia an hmachhawn. Serbia lakah beisei phak lo takin inlan bawk mah se England hian Jude Bellingham goal thun hmangin hnehna an chang a, harsa takin point thum an hmu.
England manager Gareth Southgate chuan rin lawk ang ngeiin 4-2-3-1 formation a hmang. Tlarhnungah John Stones, Marc Guehi, Kieren Trippier leh Kyle Walker te a dah a. Muallaiah tunlaia defensive midfielder tha ber pawla ngaih Declan Rice leh Liverpool wing back Aexander Arnold te a inkawptir a, hei hian sawisel a hlawh zui hle. Rice leh Arnold te hmaah hian rawlthar tha rual Jude Bellingham, Phil Foden leh Bukayo Saka te an inkawp a, an ni hian England tana goal thun hnem ber Harry Kane an chawm. England tana bul tan mi 11 aia lar zawk thlan tur an tam kher lo ang.
Player lar rual England in Serbia lakah bul an tan tha thawkhat a, goal pawh an thun har lo. Player ngaihven hlawh Jude Bellingham chuan minute 13-na lekah goal a thun a, Saka siam tha zet mai chu awlsam takin a tauh goal. England innghahna a nih ang ngeiin Bellingham-a’n a tih tur a hlen a, goal a thun.
Hmahruaina goal an thun hnuin England an khel chhe zui ta tlat thung a, beisei phak lo takin an inlan chhunzawm. Inkhel a rei a, Serbia in England an ngam a, an khel tha tawlh tawlh. Serbia hian player lar awmkhawm England lakah hian 53.2% zet ball an chang a, ball chang tam zawk an nih bakah shot on target ngah zawk an ni hial bawk. Na takin an khingpuite nawrin, hlauhawm siam thin mah se England an him hram hram zel a, Serbia in hun tawp thlengin an si phurh an sut thei lo va, England lakah uiawm takin an tlawm zui ta a ni.
Serbia lakah England an khel chhe tlang viau a, Declan Rice lo chu langsar fal an awm meuh lo. Captain Harry Kane leh Phil Foden an nil tluan a, hlauhawm siam khawpin Serbia an nawr buai chhunzawm thei lo a ni ber mai a, hei hi Three Lions nena inhmeh lo, chanchin tha lo tak a ni. Mit la zawka inlan a, team lian hneh thei turin England hian insiamthat thuai an mamawh.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More