Belarusian veltu Ukrainian nula

Ukrainian qualifier Dayana Yastremska chuan Australian Open hmeichhe singles khelh mekah lasi thawnthu ang maia a chetthat kaltluang lai chhun-zawmin nimin fourth round match pakhatah 7-6(6), 6-4-in he hmuna vawihnih lai champion tawh Belarusian 18th seed Victoria Azarenka a hneh a; he result hi Russia leh a thurualpui Belarus kut tuar mek Ukrainian mipuite tan champion tluk thuaka lawmawm a nih ngei a rinawm!
Ukrainian world number 93 Yastremska hian first round lamah pawh Wimbledon champion Marketa Vondrousova a lo paltlang tawh a, champion tura rinkai dang Azarenka hneh lehin, a grand slam quarter-final match hmasaber turah Czech world number 50 Linda Noskova a hmachhawn leh ang.
Kum 23 mi Yastremska chuan inkhelh banah a hun tawn sawichhuakin, a hlim lutuk chu a taksa atangin a thinlung chu a zuangchhuak thei mai dawna a hriat thu a sawi!
Kum 2012 leh 2013-a a zawna champion Azarenka hi nikumah pawh Melbourne semi-finalist ni lehin, kumin erawh round lina a paltlang zo ta lo a, a tlawmna tithangtlawm zual turin a hneh loh ber kher hi Ukrainian a ni lehnghal!
Kum 34 mi Azarenka pal-tlangtu Yastremska hian last eight lamah a chipui hmachhawn theihna chance nei mah se fourth round inkhel dangah Noskova nena an inkhelh laiin seeded 19th Elina Svitolina chuan hnungzang na avangin a khel tluan thei lo a, all-Ukrainian quarter-final match thlir tur a awm dawn ta lo a ni.
Wimbledon semi-finalist Svitolina hi 3-0-a a hnufual laiin a khelh chhunzawm thei ta lo a, Ukrainian qualifier Yas-tremska ang bawkin Czech tleirawl Noskova pawhin a vawikhatna atan Grand Slam quarter-final a lut ve ta a ni.
Kum 19 mi Noskova hian third round-ah world number one Iga Swiatek pawh a lo vawtla tawh bawk a nih kha.
World number three pawh lo han hawlh ve tawh kum 29 mi Svitolina chuan a hnungzang a kalh tlat thu leh a chet hleih theih loh thu sawi chungin a tlak dan chu hrehawm a tih thu a tarlang tel.
Tun nikaw chhung khan Australian Open hmeichhe singles draw lamah seeded player an tla tawp thei lo a, Yastremska pawh hi top 32 zinga pathum hnawtchhuaktu a ni.
Yastremska hian main draw atan direct entry pawh a chang pha teuh hle a, qualifying event lamah top seed luahin, main draw-ah tunge a nih a rawn phochhuak kal mek a; first round-ah Wimbledon champion leh seventh seed ni bawk Marketa Vondrousova hneh nghalin, unseeded Varvara Gracheva lakah straight-set hnehna bawk a chang zui leh a, chutah American 27th seed Emma Navarro chu deciding set-ah paltlang hramin, world number one hlui Azarenka pawh Rod Laver Arena-ah a tlawm zui leh ta a ni.