Belgian Grand Prix:McLaren one-two kan hmu leh

Belgian Grand Prix:
McLaren one-two kan hmu leh
Stavelot khuaa Formula One intlansiakna kawng lar Circuit de Spa-Francorchamps-ah Pathianni khan khuain a bumro chungin Belgian Grand Prix an tlan a, reigning champion McLaren bawk chungnung lehin, an driver Oscar Piastri chuan a teammate leh title race-a a elpui lian ber Lando Norris lehpelin pakhatna dinhmun a luah a; tun season-a intlansiak vawi 13-ah a Tum rukna atan McLaren one-two finish kan hmu leh a, a zawna a vawithumna a ni nghe nghe.
Australian driver Piastri tan tun kha kumina vawi ruk a chak berna niin, Formula One driver standing-ah point 16-in hma a hruai fal ta a ni.
Ferrari khalhtu Charles Leclerc chuan a hmaa McLaren driver pahnih thlau tak chungin pathumna a luah.
Spa-Francorchamps tlankawnga Pathianni race kha khuain a bumro nasa hle a, darkar khat leh minute 20 lai an khawtlai phah a, red-flag vai ngai khawpin khaw awm danin a zir lo a, ruah baw hawk sur tlawrh tlawrh leh khaw hmuh fiah lo avangin intlansiak a sukuk nasa hle a ni.
Reigning champion leh Inrinni sprint race hnehtu ni bawk Max Verstappen chuan intlansiak tak takah lawmman semna dawhsan chuangkai zo leh lo tawk chiahin palin a luah a, championship kal laiah point 81 zetin hmahruaitu Piastri nen an inthlau ta a ni.
Team boss Christian Horner ban hnua Red Bull-in Grand Prix an hmachhawn vawi khatnaah podium celebration an chang pha lo a; pangana chu Mercedes khalhtu George Russell a ni.
Williams driver Alex Albon chuan Ferrari seven-times world champion Lewis Hamilton dang tluan theiin parukna a luah a; Racing Bulls driver Liam Lawson pariatnaah thlengin, pakuanah chu Gabriel Bortoleto (Sauber) a ni a, point hmuh theih hniam ber ruttu chu Alpine khalhtu Pierre Gasly a ni.