Belgium laka India chakna goal khungtu Tluangi!

On Jun 10, 2025 17 0

Indian Junior Womens’ Hockey team-te chuan Argentina rama Four Nations Tournament tha taka an khelh hnuin June ni 8, 2025, Pathiani atang khan European tour an kalpui chhunzawm leh nghal a; he tour-a an match hmasa berah India hian Antwerp khelmualah 3-2-in mualneitu Belgium an hneh a, he inkhela mikhual chakna goal khungtu hi Kanghmun South tleirawl Lalthantluangi a ni.
Belgium rama inkhelah hian tan atanga minute 11-naah Geeta Yadav chuan India tan goal a thun a; Belgium chuan rawn nawrletin minute 25-na leh 34-naah India lamah goal khunginin hma an hruailet.
Chumi hnuah India erlet ve lehin, minute 40-naah Sonam chuan India si phurh a sut ve leh a; 2-2 a nih hnuin minute 45-naah chiah Kanghmun tleirawl Lalthantluangi chuan India chakna goal ni zui ta a khung a, India team tana Mizo tleirawl pahnuih fehchhuak mek duai lohzia kan hmuh belh zel.
Tarlan tawh thin angin, South American tour zawh fel tak leh European tour kal mekah hian Tluangi bakah Hnahthial tleirawl PC Lalrinpuii tel bawkin, Mizo player pahnih hi India squad tikimtu satliah an ni lo a, team tana player pawimawh an ni pha ve ve!
India tleirawl team hian June ni 8 atanga ni 17 chhung hian Belgium, Netherlands leh Australia-te a hmachhawn dawn a ni.
Kan hriat ve mai mai atan, tuntum Europe tour-a India khelhpui mekte hi senior leh junior-ah pawh world ranking-a India aia sang zawk vek an ni.
Junior-ah chuan Netherlands hi No. 1 a ni a, Australia No. 5, Belgium No.7, India No. 8.
Hmanni deuha Rinpuii leh Thantluangite goal hmanga India-in an hneh Argentina kha World No 2 an ni.
Kan naute khelhna hi a class a sang veng veng a nia aw!
Lalthantluangi leh Lalrinpuiite kan chhuang em em zel e…

– Apektei pa
Durtlang Mual Veng