Bengal-ah Congress-in anmahnia inthlan chuh mai thei

Bengal-ah Congress-in anmahnia inthlan chuh mai thei
Congress chuan West Bengal-a assembly inthlan lo awm tur chu thawhpui nei lovin anmahniin an chuh mai thei a, Left party-te nen pawh thawk ho tura inbiakna an la nei lo.
An party atanga thu hriatah Bengal-a an party unit hruaitu tam tak chuan mahnia chuh hi an duh a, kum tam tak chhung thawhpui neia inthlan an chuhah hian a tichak lotu niin an inngai a ni.
Bengal-ah hian Trinamool Congress leh BJP chuan campaign beihpui an thlak tan tawh mek laiin Congress hi an la che chhuak ve mang lo thung a. Thawhpui tur chungchangah pawh an la ngawi thei hle.
Inthlan hnuhnung berah khan Left-Congress-Indian Secular Front (ISF) tangrual chu an che chhe hle a, bial khat chauh an la a. Left leh Congress tamna thin state-ah hian BJP chu eptu party lian ber an ni ta nghe nghe.
Congress atanga thu hriatah chuan Bengal unit hian thawhpui an neih hian an party thanna a siam chuang lo va, hmun thenkhatah phei chuan a tite zawk zel thin nia ngai an awm a ni.
March-April vela inthlan turah pawh hian mahnia chuh chu an duh dan a ni a, chu chu an party intun din lehna tura thil tha zawk turah an ngai hlawm a ni.
Kumina inthlang ve tur tho, Kerala-ah chuan Left party-te leh Congress kaihhruai UDF chu thuneihna chang mai thei tura rinkai zingah an tel mek thung a. BJP chuan tun hma khan Congress hi Bengal-a Left party-te nena tanghova Kerala-a inbei leh thin si-ah a lo puh tawh thin nghe nghe.
Congress hian tun thla tirah khan an hruaitu hlun, BK Hariprasad-a chu West Bengal inthlan tura screening committee chairperson atan an lo ruat tawh.
Bengal-ah hian electoral roll Special Intensive Revision kalpui leh ED-in I-PAC hmunhma an dap chungchangah BJP leh rorel lai, Trinamool Congress inkarah inpuh tawnna leh in chhan letna thawm a ri ring tawh hle.
Congress hian anmahniin an chuh dawn leh dawn loh hi ni rei lo te hnuah an hruaitu lawkten an tihfel rin a ni.