Bengaluru FC-in an hnuai player leh staff-te hlawh pe tawh lo!

Bengaluru FC-in an hnuai player leh staff-te hlawh pe tawh lo!
2018-19 Indian Super League champion Bengaluru FC ISL hmalam hun chiang thei lo zui zel karah first team player leh staff-te hlawh pek an titawp ta rih tih an puang!
The Blues hi Mizo player tha pahnih goalkeeper Lalthuammawia Ralte leh midfielder Lalremtluanga Fanai khelhna a ni.
Top-flight league-in harsatna lian tak a tawk mek a, season tharah hian ISL an khel leh thei dawn em tih tun thleng hian a la chiang thei lo a; he boruakah hian Thawhtanni khan South Indian club chuan thuchhuah thin ti thawng tak tur tichhuakin, Indian Super League season thar dinhmun a chian loh chhoh tak zel avangin an hnuaia thawkte hlawh an pe chhunzawm dawn ta rih lo tih an tarlang.
Bengaluru thuchhuah chuan India rama football club-te dinhmun chu englai pawha khirhkhan tak a nih reng thu leh season hmatiam zel thlir pha bek bek chauh an nih thu sawi chungin tuna season thar khelh a nih dawn leh dawn loh a chian loh tak reng avangin duhthlan tur dang an neih loh thu an sawi.
All India Football Federation (AIFF) leh sumdawnna lama an thawhpui Reliance hnuaia Football Sports Development Limited (FSDL)-te’n tun thlenga contract thar an la ziah theih loh cheu avangin season tharah hian ISL an khel leh thei dawn em tih sawilawk theih a ni ta lo a ni.
Kum 2010 daih tawha contract an lo ziah tawh kha India Supreme Court lam inrawlh avangin inremna thar ziah a la ni lo a; AIFF constitution thar chungchang tihfel a nih hma chuan India rama court sang ber hian AIFF chu FSDL nena inremna thar buaipui lo turin a hriattir a, Indian football-in harsatna lian tak a tawk chho zui ta zel a ni.
Bengaluru thuchhuahin a sawi zel danin, “Kan player, staff leh an chhungte hi kan tana mi pawimawh ber berte an ni a, he harsatna chinfel hun nghah kan ngai tlang hian min nghawng vek a, AIFF leh FSDL-te chu he harsatna felfai taka chingfel thuai tur hian kan tur tak meuh a ni,” an ti.
Bengaluru-in an hnuai thawkte hlawh an pek dawn tawh loh chungchanga Reuters-in AIFF leh ISL ngaihdan a zawhte chu chhan an ni lo.
Indian media-te tarlan danin, tunkar chhung hian league dinhmun chungchangah ISL club pariatte chuan AIFF an lenchilh dawn a ni.
Bengaluru FC hi India tana goal khung hnem ber ni mek Sunil Chhetri club vawn lai niin, an captain pawhin hlawh a la tawh dawn lo a; hetih lai hian an youth team-te hlawh erawh hrensak an nih loh tur thu club thuchhuah chuan a tarlang.