BENGSIKIN FUTURE AIZAWL NGAIHTUAH A HUN TA E

David Zochhuanmawia
(Vida Hrahsel Saza)

Mizoram hi a chhunga chêng Mizote ram a ni a, a enkawlna kawngah hian mahni in leh a velah theihtawp chhuah theuh ila chuan kan tui chhe paih dan fimkhurin engemaw chenah leimin kan veng thei a, kan thianghlimin kan in leh a vel kan vawngfai thei a, boruak thianghlim a lo awm theih nan leh Oxygen a lo pun belh theih na’n thing kan phun uar thei bawk a; tui hna a lo pun belh bawk ang. Pathianin a aiawha enkawl tûrin mihring min dah si a.
Assam Rifles Sipai Lammual kan tih mai thin hi Mizoram sorkar kutah a awm ta a. AR ho pawh Berawtlangah an insawn phei deuh vek tawh a. Engtia enkawla a hmun hi eng anga hman tur nge tih ngaihtuahtu Advisory Committee din hial a ni bawk. Ruahmanna tha tak tak siam a nih rualin Building lian pui pui sakna atan ruahmanna a lo awm tih ka hriat veleh kei Aizawl Pa hian mimal tak pawha ka duh loh thu uar takin ka lo ziak tawh nghe nghe a ni.
Lammual (A.R Ground) leh a chhehvelah hian ram ngaw tak tak kan siam thei tawh lo a nih pawhin hmun hring nuam leh Natural-Park nuam tak, Aizawl boruak chhe tak ti ziaawm thei turin thing phun belhin; Natural Grass china sawngbawl nise tiin ka lo suangtuah ve thin a. Mipui tan boruak tha hîpna hmun nuam tak leh rilru hah tih thawlna hmun remchang leh nuam awm thei se tih hi tun thlenga ka mitthla a la ni fan. Water-fall nalh takte awm se, intihhlim a rîk luih luihna tûr ni lovin, rilru tih thawven nana hahdamna hmun chang se a duhawm ngawt mai.
Sorkar erawh chuan Building lian pui pui sak a, Aizawl Thana (Police Station) sawnna atan te; Sorkar Department thenkhat sawn/dah na’n ruahmanna a siam leh ut tawh tih thute kan hria a. Nakin lawkah kan inchhirna khua a la sei ang tih a hlauhawm ngawt mai! Kan hmun tha neih chhun hi Aizawl khawpui kawng tawt lutuk tihziaawmna atana AR ram tlêm kan la hêk tih loh chu thingkung phun belhna atan leh ram ngaw nuam tak, boruak tha pe chhuak thei dinna atan hmang ila, hun a lo kal zel ang a, tun atanga kum 10 (decade) ah chuan a buatsaihtute hi kan fak nasa ngawtin ka ring.
Kan ram tlu chhe zel tûr venna atâna ILP kan ngaih pawimawh tluk zetin khawpui chhunga Natural-Park siam hi kan tih mâkmawh niin a lang. Aizawl kan zauh dawn a nih râu râu chuan khawpui chhung tawta kan hmun pawimawh tam tak hi khaw daifêma sawn chhuah pheuh pheuh hi kan tih hmasak ngai a ni a. Mi nawlpui tan pawha hautak hauh lova sorkar an dawr theih nan Bus chuan man tlawm zawkin sorkarin Transport Department Bus-te a tlantir ang a, tu tan mah harsatna awm hauh lovin zawi zawiin ‘Aizawl Khawpui’ kan zauh zel ang a, khaw chhung tawt lutuk siamrem a ni chho zel ang tih hi keini mithiam lo zawkte rin dan pawh a ni.
Mizoram sorkar hian bengsikin ngaihtuah nawn leh sela, tun dinhmun chauh thlir lovin kan tu leh fa nakin lawka kan ram hruaitu la ni mai turte hmakhua thlir sakin, tun atanga kan siam rem loh chuan kum 2045-ah phei chuan motor hi a Aizawl khawpui chhungah hian a chétin a che thei tawh hauh lovin a rinawm a. A zuartute’n an la zuar reng ang a, a lei theiin an lei belh zel bawk ang a; Aizawl Khawpui chhung hi kan ropui vak lovang tih hi rin thiam a tha hle mai. Ka sawi kim loh tam tak pawh a la awm ang.
Sorkar thuneitu leh MLA neih tam ber avanga kum 2023 a Mizorama sorkarna siamtu (Ruling Party) te hian bengsikin ngaihtuah ula, “Future Aizawl, Mizoram hi ngaihtuah a hun ta e.”