Benin sipaiten president paih thla, thuneihna la

Benin sipaiten president paih thla, thuneihna la
Africa khawmualpui khawthlang lama awm, Benin sipaite chuan an ram sorkar TV-ah President Patrice Talon-a an paih thla a, thuneihna an kutah an dah tih an puang.
Benin-a French embassy atanga thu thawn chuan an khawpui lian ber, Cotonou-a president chenna in bul hnaiah silai puak ri a awm tih a tar lang.
Sipaite hian an danpui hman mek pawh hman rih loh a nih thu an puang a, khawmual leh boruaka an ramri zawng zawng pawh khar a ni tih an puang tel.
Hetih lai hian president hnaih taka awm thuneitute chuan Talon-a hi a tha a, TV station-ah sipai dangte zinga tel ve lo sipai tlem nen an awm niin an sawi.
“Engkim thunun a ni a, sipai tam zawkin an la thlawp tha a, thuneihna pawh kan la leh thuai ang,” tiin Foreign Minister Shegun Adjadi Bakari-a chuan Reuters news agency a hrilh.
President hnaiha awm mi dang pakhat, a hming tar lan duh lo pawhin AFP news agency hnenah, “Television hi mi tlem te chauhvin thununin kha thu kha an puang a. Khawpui leh ram hi a la him tha a ni,” a ti.
Sipaiten thuchhuah an siamah chuan Lieutenant-Colonel Tigri Pascal-a’n sipaite thunun ram hruaitu tur, council chu a kaihruai dawn tih an tar lang.
President Talon-a’n ram a enkawl leh kaihhruai dan chu an sawisel nasa hle bawk.
Kum 67 mi, Talon-a hi a hun vawi hnihna hmang zovin nakumah a nihna a kalsan tawh dawn a, April thlaa inthlang mai tawh tur an ni.
Sumdawng, ‘king of cotton’ tia an sawi thin, Talon-a hian kum 2016 inthlanaah khan a vawi khat nan hnehna a chang a. A vawi thum nana inthlan chuh leh a tum loh thu sawi tawhin amah thlaktu tur pawh a puang tawh nghe nghe.
French Embassy chuan mipuite chu an himna tura pawn chhuak lo turin an chah hlawm.
Benin hi Africa-ah chuan mipui rorelna ding nghet tha ber zinga mi a ni a. An khawmualpuia cotton thar chhuak hnem ber an ni a, hetih rual hian khawvela ram rethei ber zinga mi an ni thung.
Benin-a sipaiten president paih thlaa thuneihna an chang tih an puan hma lawk hian an thenawm lawk, Guinea-Bissau-ah pawh Umaro Sissoco Embaló paih thlain sipaiten thuneihna an la tawh bawk.
Tun hnaiah Africa khawthlang lama Burkina Faso, Guinea, Mali leh Niger-ah sipaiten thuneihna an chang nasa hle a, hei hian heng lai bawra himna pawh a tiderthawng hle a ni.
Benin pawh hi tun hnaiah jihadist chetna a pung nasa a, Islamic State leh al-Qaeda firfiak pawl nena inzawmna nei pawlten chhim lam an tuam zau tawh hle.