Benzema thutluknain Ancelotti tihrilhhai

Pathianni La Liga season tawp ni khan Real Madrid chuan tun nipui laia Karim Benzema chhuah tur thu an puang thut a, khawvel a barakhaih rualin Real head coach Carlo Ancelotti ngei ngei pawh a phu zawk!
Italian coach chuan Pathiannia Athletic Bilbao nen 1-1-a an inhnehtawk hnu khan Benzemna chhuah tur chungchanga mak a tih thu sawichhuakin, “A thutlukna siam hian mi zawng zawng a barakhaih a, mahse, a chiang tawk hle bawk si. Last-minute decision a ni.
“Niminah pawh pangngai takin training a zawm a, vawiinah thutlukna a siam ta thut a, kan pawm mai erawh a ngai ang. Tukin zing khan kan inbia a, chhuah a duh thu a sawi a, a chiang tawk a ni,” a ti.
Real Madrid coach hian sawizawmin, “Ka enkawl tawh khawvel player ropui zinga pakhat a ni a, chutiang zinga striker tha berte zinga pakhat a ni,” tiin a fak tel.
Trophy chi hrang hrang la chunga kum 14 zet a khawsakna Real Madrid chhuahsan tur Benzema hian he thuam inbel chungin Ballon d’Or pawh a lo dawng tawh a; tunah kum 35 mi ni ve tawhin, season tawp rualin free agent nihna nen Bernabeu club a chhuahsan dawn a, Lionel Messi ang bawkin Frenchman hi sum tam tak hlawh turin Saudi Arabian club Al Ittihad lama kal tura sawirik mek a ni.
Benzema hian Pathianni zan khan Bernabeu-ah a team tlawm tur chhan lehin, penalty atangin mikhual team an draw-na goal a chhuihlut a, hun tawp dawna thlak a nih laiin Madrid mipuiin zahna leh lawmthu sawina hlan chungin an forward kalbo tur an thlahliam.
Kum 2009 khan Olympique Lyonnais chhuahsanin Real a zawm a, Bernabeu a thlen tirh atangin tlarhma lama an innghahna lian ni nghalin, kum 2018-a Juventus lama Cristiano Ronaldo insawn hnu phei kha chuan Real Madrid tlarhma lama an ngulpui ber a ni chho ta nghe nghe.
Goal 350 thun chungin Real tana goal khung hnem ber dawttu niin, Ronaldo chiah phak loh a nei a; Spanish giants tan trophy 25 la tlingin, chu’bng zingah chuan European Cup panga, La Liga title pali leh Copas del Rey pathum a tel.
Tun nipui laia Real chhuahsan tur zingah forward Eden Hazard, attacking midfielder Marco Asensio leh striker Mariano Diaz tel bawkin, club president Florentino Perez tan season chawlh lai hian tlarhma lam pawp thawm hna a tam dawn!