Bethlehem Vengthlangin an mamawh hnehna sualchhuak

Bethlehem Vengthlangin an mamawh hnehna sualchhuak
Thawhlehni tlai Tata SK 712 Pro Volleyball League hmeichhe inkhelah Bethlehem Vengthlangin an mamawh hnehna an chang a, 3-0-in Durtlang lakah an chak.
R. Dengthuama Indoor Stadium, Mualpuiah Elisian Medai a inlar thar leh a, point 25 hmuin tum nga hloh mah se D3 Business Player of the Match lawmman a dawng a, 25-7, 25-12, 25-20-in Bethlehem Vengthlang a chakpui.
Kanan leh Luangmual laka an tlawm zawn hnuah champion lai Bethlehem Vengthlang an derthawng na a, Durtlang lakah hneh takin inkhel an thunun nghal a, player-te’n nuam ti takin an khel.
Set hnih an hloh zawn hnuah Lalpekhlui’n kum lama naupang rual awmkhawmna Durtlang nawrkalin 13-8-in hma an hruai hman a, mahse, Bethlehem Vengthlangin beiletin point kua an hmu zawn a, an lehpelh hnuah hawikir tawh loin an tlang.
Bethlehem Vengthlang tan Lalchhandami’n vawi ruk vaw tlain, Chinglunkimi’n point ruk a thawh bawk a, chutih laiin point li ve ve paihin mimalin Serkawn Lunglei nula Elisian a langsar.
Mizoram inelna sang berah el thamin Durtlang an inlan phak lo zui zel. Team chawikang tham player theihna nei tha an kawl tawk lo a, Peki’n point riat a hmuh laiin vawi sarih a tisual a, team tana thawhhlawk ber a ni.
Kum 2019 champion an nih hnuah Durtlangin Pro Volleyball-ah harsatna an tawk a, khelh ruk an tlawm zawnna niin, knockout round inhlangkai turin an hmabak khelh hnihah chak ve ve an mamawh.
|um li an khelh tawhah a vawihnihna’n Bethlehem Vengthlang an chak ve thung a, semi-final lut thei dinhmunah inhungin, June ni 19-ah league an khel zo dawn a, an hnuaia awm mek Power an hmachhawn ang.