Beyonce ‘Cowboy Carter’ a la No.1

On Apr 16, 2024 12 0

Beyonce album thar ‘Cowboy Carter’ chu kar khat chhunga US-a album hralh that ber niin, Billboard 200 (albums) chart-ah a No.1 a, he cart-a kar hnih a No.1-na a ni ta. Hetihrual hian J. Cole, TOMORROW X TOGETHER leh Benson Boone te pawh chart top 10-ah an debut.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album a hla mal hralhna atanga album tlukpui te belhkhawm thin a ni.
Beyonce ‘Cowboy Carter’ hi kar khat chhungin US-ah 1,25,500 an hralh leh a, chung zinga 1,03,000 chu streaming atanga album hralhna tlukpui (on-demand official stream maktaduai 132.69) niin, album tak tak hralh chu 20,500 a ni a, album-a hla mal hralhna atangin 2000 a tling thei bawk.
Beyonce hian he chart-a No.1 kai the album pariat a nei tling taw a, chung zinga album pathum te chu kar khat aia tam No.1 thei an ni a, Cowboy Carter bakah a self-titled album chu 2013-14 khan kar thum a No.1 a, 2011-ah ‘4’ kar hnih a No.1 pui tawh bawk.
J. Cole album thar ‘Might Delete Later’ chu 1,15,000 hralhin No.2-ah a debut a, chung zingah 1,05,000 chu streaming atanga album hralhna tlukpui (on-demand official stream maktaduai 137.95) niin, album tak tak hralh chu 9,000 a ni a, album-a hla mal hralhna atangin 1,000 a tling thei bawk. Might Delete Later hi J. Cole album chart top 2-a lang thei pasarihna a ni a, chung zinga album paruk chu No.1 an kai vek a ni.
Might Delete Later hi thawt lawk pawh awm em em lovin April ni 5 khan a tlangzarh thut a, he album-ah hian Gucci Mane, Cam’ron, Bas, Central Cee, Ari Lennox leh Young Dro te pawhin an pui nghe nghe a ni. He album-in ngaihven a hlawhna chhan pakhat chu Kendrick Lamar a kahna hla ‘7 Minute Drill’ a ni a, he hla hi Lamar-a’n Cole leh Drake a khana hla ‘Like That’ a chhan letna a ni.
K-pop group TOMORROW X TOGETHER album thar ‘Minisode 3: TOMORROW’ chu 1,07,500 hralhin No.3-ah a debut a, chung zinga 1,03,500 chu album tak tak hralhna niin, streaming atangin 4,000 a tling thei a, hla mal hralhna erawh chhiar tham a ni meuh lo. Tihian kar liamta album tak tak hralh tam ber an ni thung. Tihian he chart top 10-a lang thei album panga an nei ve ta a ni.
Chart No.1 hlui Future leh Metro Boomin album intawm ‘We Don’t Trust You’ chu 99,000 hralh lehin No.2 atangin No.4-ah a tawlh a, chart No.1 hlui Morgan Wallen ‘One Thing at a Time’ chu 72,000 hralh lehin No.3 atangin No.5-ah a tawlh ve thung.
Benson Boone full length studio album hmasa ber ‘Firework & Rollerblades’ chu 58,000 hralhin No.6-ah a debut a, he chart-a a vawi khat lanna a ni. He album hi a hla hit ‘Beautiful Things’ awmna niin, he hla hi Billboard Hot 100 (singles) chart-ah kar 9 chhung top 5-ah a awm tawh a, No.2 te pawh a lo kai ve zak zak tawh a ni.
Chart No.1 hlui Ariana Grande ‘Eternal Sunsine’ chu 48,000 hralh lehin No.4 atangin No.7-ah a tawlh a, Noah Kahan ‘Stick Season’ chu 45,000 hralh lehin No.7 atangin No.8-ah a tawlh a, chart No.1 hl Olivia Rodrigo ‘Guts’ chu 43,000 hralh lehin No.6 atangin No.9-ah a tawlh a, chart No.1 hlui bawk SZA ‘SOS’ chu 40,000 hralh lehin No.9 atangin No.10-ah a tawlh ve leh ta bawk.