Box office-ah ‘Civil War’ a No.1

Dystopian action movie, America tual chhung buaina tarlanna ‘Civil War’ chuan tun weekend kalta khan North America-ah cinema hall ticket hralhna atangin dollar maktaduai 25.7 lalutin, box office No.1 a ni. Dystopian movie tih chuan hun lo la awm tura thil thleng, sorkar a corrupt emaw, sorkarin na a thawk hleithei lo emaw te a ni thin a, khawvel a buai a, inthliarna te a nasa thin. Civil War-ah pawh hian America sorkar kal fuh loin thil a thlen vel tarlan a ni.
A thawnthuah chuan a changtunu Kirsten Dunst chu indona hmuna potojournalist a ni a, a thawhpui te nen USA tual chung buaina kara an che chhuak a. Ram rorelna chu tum thum president-na chelh mek Nick Offerman kutah a awm ve thung. Eng vanga buai nge an nih tih erawh chiang taka tarlanna a awm lo va, president berin FBI a ti tawp thut mai a, hei hi President hlui Donald Trump-a’n a hun laia FBI a dah hniam dan vel nen an khaikhin.
Civil War hi awmze nei taka tihchhuah niin a lang a, kumin hi USA President thlan kum a lo ni a, President Biden leh President hlui Trump te chuan White House-a kir leh ngei tumin tan an khawh mek a, an party atanga leading candidate an ni rih ve ve bawk.
Box office No.1 hlui Godzilla x Kong: The New Empire-in a weekend vawi thumnaah dollar maktaduai 15.5 lalut lehin No.2 a la ni a, he film hian US-ah kar thum chhungin dollar maktaduai 157.9 lalut tawhin, US pawna a lakluh nen chuan dollar maktaduai 436.6 a tlin ve ta bawk.
Box office No.1 hlui bawk Ghostbusters: Frozen Empire pawhin a weekend vawi li-naah dollar maktaduai 5.8 lalut lehin No.3 a la ni a, he film pawh hian kar li chhungin US-ah dollar maktaduai 9.9 lalut tawhin, khawvel huapin dollar maktaduai 160 a lalut tling ve tawh bawk.
‘Dune: Part 2’ pawh a la kal tluang viau a, a weekend vawi sarihnaa dollar maktaduai 4.3 lalut lehin No.5 a la ni thei a, he film hian US-ah dollar maktaduai 272.3 lalut tawhin, khawvel huapin dollar maktaduai 683.9 a lalut tling ve tawh bawk.
Dev Patel channa ‘Monjey Man’ a che fuh hleithei lo va, a weekend vawi hnihnaah dollar maktaduai 4 chiah la lut lehin, No.6-ah a tawlh a, he film hian ni 10 chhungin US-ah dollar maktaduai 17.6 chiah a lalut thei a, US pawn lamah pawh ram hrang hrang 27 atangin dollar maktaduai 22.8 chiah a la lalut bawk.
Box office top 10 te chu:
1 Civil War $25,712,608
2 Godzilla x Kong: The New Empire $15,450,000
3 Ghostbusters: Frozen Empire $5,800,000
4 Kung Fu Panda 4 $5,500,000
5 Dune: Part Two $4,320,000
6 Monkey Man $4,100,000
7 The First Omen $3,781,000
8 The Long Game $1,390,000
9 Shrek 2 $1,350,000
10 Sting $1,200,000