Bezos leh Sanchez ten an inneihna hriatpui tura an sawmte present pe lo turin an ngen

Bezos leh Sanchez ten an inneihna hriatpui tura an sawmte present pe lo turin an ngen
Khawvela pahausa ber dawttu ni mek, Amazon founder, The Wasington Post neitupa leh astronautics company Blue Origin neitu ni bawk, Jeff Bezos, kum 61, leh Lauren Sanchez, kum 55, te chuan June ni 27 hian Venice, Italy-ah “Tiam tlat e,” an ti dawn ta a, an inneihna hriatpui a, mo lawm tura an sawm te chu thilpek engmah keng lo turin an ngen a, an mi sawmte pualin anmahni zawkin donation an pe hlauh!
Inneih sawmnaah chuan, “Min rawn telpui theih chuan kan lawm ngawt ang. Thil pakhat erawh kan ngen hmasa duh che: khawngaihtakin thilpek rawn keng suh,” tih an ziak lang a, mo lawmna thilpek dawn aiah anmahni zawkin an mo lawm tura an sawmte pualin donation an pek thu an tarlang tel a. “He khawpui thil hlui hlu tak tak te vawnhim a nih zel theih nan i aiawhin UNESCO Venice Office-ah donation kan pe tawh e,” tih an ziak tel bawk.
Jeff Bezos leh Lauren Sanchez te hian 2019 khan an inngaihzawn tih ualau takin an tilang tan a, 2023-ah an inhualin, tunah chuan an inkutsuih dawn ta a ni.
Jeff Bezos hian a nupui hmasa MacKenzie Scott nen fa pathum an hring a, China atanga fanu an adopt bawk. An fapa upa ber Preston Bezos hming chiah an puangzar thung. Jeff leh MacKenzie te hi 1993-ah innei a, kum 25 hnuah, 2019 khan an inthen a, MacKenzia Scott hian dollar tluklehdingawn 165 vel zet a chhuahpui a, khawvela nupa inthennaa sum chevel tam berna a la ni a, an inthen lai hi Bezos pawh khawvela pahausa ber a nih lai niin, an inthen hlimchhawmah hian a MacKenzie Scott pawh khawvela hausa list-ah 22-na a ni pha nghal!
Lauren Sanchez pawh hian Tony Gonzalez lakah fanu Nikko Gonzalez, kum 24, bakah Patrick Whitesell lakah fa pahnih- Evan, kum 19 leh Ella, kum 17 a nei tawh a, June ni 22 khan Evan-a kum 19 tlin champha lawmna pawh pui tham takin Croatia tuipui-ah, Jeff Bezos-a nuamtawlna lawng lian, dollar maktaduai 500 man yatch-a an lawm mup mup tawh bawk.
Jeff Bezos leh MacKenzie Scott te inneih dawn khan Bezos hi khawvela pahausa zingah chhiar tel a la ni lo a, Amazon pawh an inneih hnua rawn lian ta chauh a ni a, an inneih hmain prenuptial agreement (innei tur ten an inneih hmain an inthen leh palh a nih pawhin a ro insem dan tur leh thil pawimawh danga inremsiamna an neih lawk) an neih loh avangin inthenaah sum tam tham tak a chevel a, tuna Lauren nena an inneihna turah hi chuan prenuptial agreement an nei thlap tawh niin Provinziano chuan an tarlang.
Bezos leh Sanchez te prenup hi engtiang chiahin an siam tih a hriat lohnain, Provinziano chuan an lo inthen leh palh a nih chuan Sanchez hian an inneih chhung kum khat zel atan dollar maktaduai khat zel a chhuahpui theih dawn bakah an inneih hnuah an in hmun lo ram neih tharah te chanpual a nei thei dawn niin an tarlang. Tuna Jeff Bezos hausakna hi Forbes chuan dollar tluklehdingawn 215 niin an chhut.