Biak in saknaa hnatlang turin sawm
Thenzawl rama ‘Zofate Pathian biak inpui’ sak mekah vawiin – Thawhtanni hian a ban phun hnatlang koh a ni a, thawkchhuak thei lo tan pawh thawhlawm hmanga hnatlan theih a ni tih a satute chuan an sawi.
Zoram Thar Zofate Lairelna Inpui chuan vawiin – April 21 hian Zofate Pathian biak inpui sak turah ban phunna hnatlang an ko tih an pawl ziaktu lian Lalruatfeli Hlawndo chuan a sawi a. Zofa Zohnahthlak zawng zawng ban phun hnam hnatlangah thawkchhuak turin an sawm a. A hmuna hnatlang thei lo pawh hnatlang thawhlawm hmangin a hnatlang theih tih a sawi.
Banpui hi 50 phun phawt tur a ni a, a thawh khatna (first stage) a ni anga, ban pakhat man hi Rs. 50000 anga chhut niin, a ban man hi mimal, chhungkua, pawl, kohhran emaw hnam chi peng hrang hrang anga thawh duh tan thawh theih a ni a. A thawhte chu Zoram Thar Zofate Lairelna hminga citation pek an ni dawn tih a sawi a ni.
Zoram Thar Zofate Lairelna Inpui hruaitu Rev Dr Zaichhawna Hlawndo leh ziaktu lian Lalruatfeli Hlawndo te hian Zofate Pathian biak inpui sak tum chungchang inhrilh darh leh hnatlang thawhlawm lakkhawm chu USA-a Zofate hnenah neih nise, tia an lo rel tawh angin, May leh June thla chhung hian USA-a kohhran leh pawl hrang hrangah hun hmang turin an inruahman tih an sawi bawk.
“Zofate Pathian biak inpui hi Krista leh hnama kan inpumkhatna tur hmanrua bakah chanchintha hrilna tur hmunpui a nih avangin, rilru hmunkhat pua hnam hnatlang atan kan theihna zawn theuha thawk chhuak turin Lal Isua Krista hmingin Zofa zawng zawng kan sawm a ni,” Lalruatfeli Hlawndo hian a ti.
Biak in saknaa hnatlang turin sawm
Get real time updates directly on you device, subscribe now.