Bial tina department hmalakna MLA ten dawng vek ang – CM

MLA bial tina sawrkar department hmalakna chu MLA zawng zawngten an hriat ve zel theihnan a copy pek vek zel an ni tawh dawn tih chief minister Lalduhoma chuan a sawi.
Thawhlehnia Assembly Session-ah House leader Lalduhoma hian thu a sawi a. State sum dinhmun vangin austerity measure an lak viau a ngai dawn a. Term hmasa lama House member-ten an dawn leh neih thin eng eng emaw chu a tih theih tawh dawn loh a, hlawh pawh tihpun a ni dawn lo, tiin, “Hruaitute kan nih angin hma kan hruai a ngai dawn a ni,” a ti.
Mahni bial theuh enkawl kawngah inelna thianghlim nei turin member zawng zawng a chah tih a sawi a. Ruling leh opposition thliar hrang loin, an sawrkarin bial tinte khairual taka hmasawnna kawnga ke an pen theihnan theihtawp an chhuahpui theuh dawn tih a sawi. “Tunhma lamin kan bial chhunga department hrang hrangin hma an lakna a copy MLA ten kan hmu ve ngai loa, dap chawp a ngai thin. Tun atang chuan bial tina department-te hmalakna hi member zawng zawng pek thin an ni tawh dawn,” a ti.
House member nih chu zirlai exam tur anga inzir ngai leh tan lak reng ngai, zir zawh awm thei lo a ni tih House leader hian a sawi a. Taimak leh thawhrim a pawimawh a, thil thar kan la tawn ngai loh hriat thar tur a tam a, session hmasa ber atangin taima leh taima lo kan hriathran dawn, tiin a sawi.
Mizoram Legislative Assembly House-ah hruaitu ropui tak takin hma an lo hruai tawh a, chief minister kalta te a hrawn hman vek a, an hnen atangin thil tam tak a zir a, an chungah lawmthu a sawi tih Lalduhoma hian a sawi. Term thum chhung opposition leader niin, Pu Lal Thanhawla leh Pu Zoramthanga te a hrawn tawh a, an ni pahnih nen hian House-ah ‘tradition’ tha tak an hnutchhiaha a hriat ve thu sawiin, an chungah lawmthu a sawi.
“Tradition tha tak, kan hnunga lokal leh turte hnenah kan hnutchhiah ka beisei a. Speaker thuawih theih leh tawngkam hawihhawm hman a ngai. India ram hmun danga State Assembly leh Parliament-a an chin dan tha lote kan lalut ngai lo. Keini chuan ‘culture’ hran kan nei a, chu chu tungding zel turin member-te ka ngen a ni. House zahawm ber leh tha ber, entawntlak hi kan export ve theih tur a ni a. Kan hruaitu hmasaten min lo hruai tawhna, an hnung zuiin tih hlawhtlin kan tum dawn a ni,” a ti.
‘Member zahawm tak’ tih leh ‘chief minister zamawm tak zarah’ tih ang chia infaksiak vak vakte ti lo turin chief minister Lalduhoma hian House member-te a ngen a. “Chief minister zara engemaw lo tihlawhtlin a awm a, kan sawi ve zawk a nih chuan thudang a ni. A thawka phita House leader intlawnsiak anga infak vak vak hi tul kan ti ve lo,” a ti.