BIAL VIL
By Lalngaihawma Pachuau
Kumin hi MLA inthlan kum a lo ni leh ta a, kumnga lo awm tura kan ram hruatu nih tumin political party hrang hrangte an inbuatsaih leh ta mup mup a, inthlan kum dang ang bawkin kan tang tlang leh ta hlawm hle.
ZPM party chuan inthlan kum danga tih ngailoh takin hma takah bial viltu tur an ruat kim titih der a, MNFparty pawhin tam vak lo chu an ruat ve tawh bawk a, party dang erawh chuan an la ruat rih lo thung a ni awm e.
Tin, heng bial vil tura ruat te hi an party lam chuan tunhnai khan kumin MLA inthlan tura party official candidate tur an ni tih an puang chiang leh ta bawk.
Engtinnge bial an vil dan chu ka hriatpui hauh lo nang’in, bial viltute hian an bial chhunga damlo kan, mitthi ral, chhungkaw hrang hrang tlawhchhuah, street campaign, khawtlang mamawh tihsak (sponshorship, free clinic, kawnglaih, chhawmdawlna etc.) te in bial an vil tha hle nia sawi a ni a, mipuite tan a thain a chhenfakawm hle ang.
A-leh-lam zawnga thlir erawh chuan heng bial viltute hian sum leh pai, tha leh zung, hun tam tak an seng nasa hle ang tih a rin theih a ni.
Mizoram pum pui hi bialtu MLA nei lai vek kan ni a, hetia bialtu MLA nei chunga political party te’n bial viltu an ruat ve ringawt hi a fuh em? Ngaihtuah chian ngai tak a ni zawk lo’ng maw?
Hetianga bial viltu lo ruat lawk hi kan kalphung thar a nih vaih zel chuan a sum nei nei, thusawi thiam thiam, a zak thei lo lo te kutah kan ram hi kan dah dawn tihna a ni thei a, kan hmabak hi a ngaihtuahawm viau thei a ni.
Legislator tha ni tura thiamna leh theihna nei; mahse sum leh pai, mi biangbiak leh thusawi lama talent nei ve lo tan ram hruaitu nihna chance kan siam ve lo tihna a ni anga, tin, a-thu-hrimah thusawi leh mi biangbiak lama tha leh sum ngah te’n kan ram hi min lo hruai tawh thin a, kan thlen chin chu heti hi a ni.
Tunhnaia chanchinbu rintlak tak pakhat tehna atang pawhin India ram pum puia leiba ngah ber state kan la ni mek a ni maw!!
Heti ang zawnga sorkarna siam tuma hmalakna hi ramhlui zia, kan bansan tur niin i hre ve em le?
Bial lo vil lawk hi tha i ti em?