Biden-a’n thangtharte kian ti

US President Joe Biden chuan television kaltlanga Americans te hnena thusawina a neihah ‘thangthar zawk te tana hmun ken a hun tawh’ tia sawiin president nih tuma a chuhzui tawh loh chhan a sawifiah.
Kum 81-a upa Biden chuan a candidacy hnukdawkin US Vice-President Kamala Harris chu Demcrats leh ram inlungrual nan a thlawp tiin a sawi bawk.
Tun hi 21 July a presidential race atanga a inhnuhdawh thu a puan hnua White House atanga thusawina a neih leh hmasak ber a ni bawk a.
Chutih laiin Republican presidential candidate, Donald Trump thung chuan Kamala Harris chu ‘radical left lunatic’ tiin rally a neihnaah a sawi thung.
Biden hian White House Oval atanga thusawina a neihah minute 11 chhung hun a hmang a, amah mai bakah a nupui Jill, a fapa Hunter leh fanu Ashley te leh White House staff pawimawh dang ten an tawiawm a ni.
“He office hi ka ngaihlu a ni” tia sawiin, “Mahse ka ram ka hmangaih zawk” tiin a sawi a. “Hma lam pan zel nana tha bera ka ngaih chu thangthar zawkte hmun ken a ni” tia sawiin kum sawm nga chuang public office luah tawh Biden chuan, “Chu chu kan ram lungruala siam nana tha ber a ni,” tiin a sawi bawk.
President chuan nakum January thlaa a term tawp hma zawng chuan American mipuite tan a hna a thawh chhunzawm tur thu sawiin Kamala Harris chu ‘tawnhriat nei tha, khauh leh theihna nei’ tiin a sawi bawk.
Biden chuan president a nihna anga a record chuan second term a thlentir theih a rin thu sawiin mahse ‘kan democracy humhimna tur engmahin a dal tur a ni lo’ tia sawiin, ‘chung zingah chuan mimal ambition pawh a tel’ a ti bawk a.
“America ropuina ber mai chu lal leh dictator ten ro an rel ve ngai lo. Mipuite rorelna a ni a, history in kutah a awm. Thuneihna in kutah a awm a, idea of America in kutah a awm a ni,” tiin a sawi.
Biden chuan thusawina a neihah karthum vel zet Democrats hotu lawk tena inhnukdawk tura an nawrna te leh thla kalta tawp lama Trump nena an debate a chetchhiat tak te chu a sawi lang lo thung.

Obama-a’n la thlawp lo
Democratic leader tam ber ten Kamala Harris an thlawp tawh thu an sawi laiin US president hlui Barack Obama chuan ngawih a la chuh thung.
New York Post sawi danin Obama chuan Harris-in Donald Trump a hneh theih a rin loh vang tiin a tarlang a. “Harris a chak zo dawn lo tih a hriat avangin Obama chu a mangang a ni” tiin New York Post chuan a tarlang.
“Obama chuan Harris chu tha tawkah a ngai lo va, border czar mahse border tlawh ngai miah lo, migrants tin ten health insurance an nei tur a ni titu a ni a. A hma lama chilpuah bomb awm a paltlang thei dawn lo. President nih i tum chuan thil sawi chi leh sawi loh chi a awm a ni” tiin tarlan a ni bawk.
Obama chuan Biden chu inhnuhdawk se a duh avangin actor George Clooney-a’n article a ziah te pawh kha ruahmnna vek a ni, a ti bawk a.
Obama chuan Arizona Senator Mark Kelly chu thla thara Democratic National Convention neihnaah presidential nominee ni se a duh tiin New York Post chuan a tarlang bawk a.
“A ruahman anga thil a kal loh avangin Obama chuan tun thlengin Harris chu a la thlawp duh lo” tiin tarlan a ni bawk.
Mahse, NBC News report thung chuan Barack Obama chuan Kamala Harris chu a thlawp thu a puang thuai dawn tiin a tarlang ve thung.