Bihar-a seat insem dan tur ngaihtuah

Inchuhna karah Bihar bikah Mahagathbandhan (Grand Alliance) coalition partners te chuan seat insem dan turah 17:17:05:01 formula hmangin, Rashtriya Janata Dal (RJD) leh Janata Dal (United) te chuan 17 seats an chuh ang a, Congress ten seat 5, Communist Party of India (Marxist-Leninist) ten pakhat changin Bihar a 40 Lok Sabha seats chu insem a ni dawn tia sawi a ni.
Mahse, Left leaders te chuan hei aia tam zawk seat an ngiat tia sawi a ni a, Congress te chuan formula chu puan chian vat a ni ang a, a la tlai lo an ti bawk.
Heng mai bakah hian Bihar Chief Minister Nitish Kumar chuan January 22-a Ram Temple Ayodhya a hlanna neih niah State Assembly chu a thiat dawn tia sawi a ni bawk.
JD(U) leh RJD leader te chuan seat insem dan tur formula ngaihtuahin an inhmukhawm zing hle tih a ni bawk a. Kum 2019 Lok Sabha inthlanah khan JD(U) te chu BJP te nen tangin National Democratic Alliance (NDA hnuaiah an awm a. JD(U) te chuan seat 17 an chuhah seat 16 an la a, BJP te chuan seat 17 an chuh an la vek thung. NDA ally dang Lok Janshakti Party (LJP) te chuan seat ruk la bwkin Congress te chuan Kishanganj seat chauh la in RJD ten seat khatmah an la lo thung.
JD(U) leader te chuan an sitting MP te chu khawih buai an ni dawn lo tia sawiin seat 17 chu an la chuh vek dawn an ti a, hei vang hian Congress leh Left party-te hmui turin RJD te chungah a tla ta a ni. JD(U) te chuan seat 17 kan chuh tur a ni tiin INDIA (Indian National Developmental Inclusive Alliance) pawh kan hrilh tawh tiin senior party leader K.C. Tyagi chuan a sawi . “JD(U) chuan RJD ten sorkar kan siam mek a, Congress leh Left party te nen Grand Alliance kan siam a ni” tiin Energy, Planning and Development Minister Yadav chuan a sawi.
Mahse, State Congress president Akhilesh Prasad Singh chuan “JD(U) leh RJD te hian seat 15 chuh ve ve se la, INDIA bloc-a tel party tin te chu kan inpawhfan theih a ngai, chu chu Lok Sabha inthlan kan hmachhawn ho theih nana pawimawh a ni” tiin Singh chuan a sawi a. “Bihar-a seat insem dan tur chu tihfel vat a ni ang,” tiin a sawi bawk.
Left parties, Communist Party of India (CPI) leh CPI(ML) te pawhin an demand an thlen tawh bawk a. CPI general secretary D. Raja chuan RJD leh JD(U) leaders te chu Patna-ah titipui tawhin Begusarai seat phei chu chan an duh thu a sawi a.
Begusari hi tun hma atang tawha Communist tamna niin mahse kum 2019 khan BJP candidate Giriraj Singh chuan CPI candidate Kanhaiya Kumar chu hneh takin a hneh a ni. Kanhaiya Kumar chuan Congress zawm zuiin kumin Lok Sabha inthlanah Delhi atangin a chuh hmel thung.
CPI(ML) te pawhin Ara, Siwan leh Jehanabad chu chan an duh a, mahse, Mahagathbandhan leader te chuan Ara chauh an pe dawn tia sawi a ni a. “Kan palai ten RJD leader Tejashwi Yadav kan hmu thuai ang a, a pa Lalu Prasad pawh kan hmu tawh bawk a. Insiamrem kan inpeih a, chutihrual chuan seat insem chu zahawm taka kan kalpui a ngai a ni,” tiin party State secretary Kunal chuan a sawi.
Hetih lai hian Bihar Chief Minister hlui leh Hindustani Awam Morcha(Secular) leader Jitan Ram Manjhi chuan boruak siamin CM Kumar chuan eng hunah pawh ‘BJP atanga sawmna a hmuh chuan’ political U-turn a kalpui thei tiin a sawi thung.
Poll strategist atanga political activist ni ta Prashant Kishor, Nihar a Jan Suraaj (People’s Good Governance) campaign thla 15 lai kalpui tawhtu pawhin Nitish Kumar politics zinkawng chu a zuai lam a ni tawh tia sawiin kum 2024 inthlanah JD(U) ten seat khamah an la lovang a ti ve thung.
Prashant Kishore thusawi avang hian Bihar politics boruak chu atang zual hle tura ngaih niin kumina Lok Sabha inthlanna neih mai turah inhrui pawhna a nasa hle tawh a ni.