Bihar CM Nitish Kumar an NDA thawhpui mai

Bihar Chief Minister leh JD(U) leader Nitish Kumar chuan State a rorel lai Mahgathbandhan mai bakah Opposition INDIA bloc chhuahsanin BJP kaihhruai National Democratic Alliance (NDA a zawm dawna sawi a ni.
INDIA bloc din a nih theih nana sulsutu ber chu Nitish Kumar erawh a ni thung a. Nilaini khan West Bengal leh Punjab Chief Minister te chuan Trinamool Congress leh AAP te chuan Lok Sabha poll 2024 chu an State-ah ve ve a malin an chuh dawn thu an puang bawk.
Kumar chuan Rahul Gandhi a Bharat Jodo yatra neih mek January 29 a Bihar Kishanganj lut tan turah a tel a rinawm ta lo va. Congress leader te chuan a hmain Kumar chu January 30-a Purnea a public meeting neihnaah tel turin an lo sawm tawh thung.
Bihar-ah politics a chiri hle a, January 25 khan Cabinet meeting neihnaah pawh minute 15 chauh hun hman nia sawi a ni a. JDU leh RJD te inkara inhriatthiamna awm thin chu hmuh tur a awm tawh lo tia sawi a ni.
He mi hnu lawk hian RJD chief Lalu Prasad fanu Singapore a awm Rohini Acharya chuan social media platform X ah post pathum a zawna siamin chu chuan JDU leh RJD sorkar mek dunah khi a awmzia a pholang tia sawi a ni a.
“Thli tleh ang zela ideology thlak theiin socialist veteran a inti a ni” tiin Acharya chuan a post pakhatah ziakin chu chu Kumar a sawina nia ngaih a ni a. A post dangah pawh, “Mahni fel tawk lohna hmu hauh lova huang tau taka midang chirhtheh” tih niin a post pathumaah chuan, “Phu hauh lo hnena chawimawina pek a nih chuan thil fuh lo a awm ang a. Mi tumah bumna a awm chuan tu in nge kalpui danah zawhna nei ang?” tih te a ni.
Mahse a thil post chu Acharya chuan darkar khat hnuah a delete chungin hmu hman an tam tho si avangin thawk dun party pahnih inkarah khi a siam nasa zual a ni.
A hnuah Kumar leh Prasad chuan Patna-ah an hruaitu lawk te an hmu dun ve ve bawk a, legislators tin te chu Patna chhuahsan lo turin an hrilh ve ve bawk.

Dynastic politics bei
January 24 khan Patna-a veteran socialist leader Karpoori Thakur piancham kum zana lawmna neihnaah Kumar chuan ‘dynastic politics’ zuitu hruaitute chu na takin a bei a. Bihar State political circles ah chuan Kumar thusawi chu RJD chief Lalu Prasad leh Congress beihna anga ngaih a ni.
Hetih lai hian JDU hruaitu lawk te chuan ‘Nitish Kumar-an thutlukna a siam tin chu Bihar tana tha tur a ni mai’ an ti a. Mahse, RJD leader te thung chuan ‘Kumar-an political U-turn a neih dawn apiangin tawngkam heng ‘bihar’s interest” tih ang te ‘chhungril lama hriatfiahna’ tih te leh ‘eng nge lo thleng tur leh engtiangin tih te chu lo thlir ila’ tih te chu a tawngkam hman thin a ni an ti ve thung.

|um ngana tur
Bihar State chhungah chuan Kumar-an ruling Mahagathbandhan leh INDIA bloc chhuahsana NDA a zawm leh chuan a political U-turn tum nga a ni dawn a ni. November 2005-a chief minister a nih lai thovin a thawhpuite paihthlain chet a la hmasa ber a, a political U-turn hnuhnung ber chu August 2022 a BJP te thlauh thlaa RJD, Congress leh Left party te nena thawk hova grand alliance an siam kha a ni.
JDU hruaitute chuan Kumar chu 2024 Lok Sabha poll neih tura INDIA bloc chunga thil chiang awm har lutuk chuan a tihnual an ti a. Seat insem dan tur tihfel hleihtheihloh chuan a tihnual takzet a ni tiin an sawi.
Hetih lai hian BJP top leadership chuan senior State party leader te chu New Delhi-ah an ko thla nghal a. State BJP leader pakhat chuan ‘Kumar hian Chief Minister atanga a bana BJP te CM nihna a pek chauhin kna thawkho thei ang’ tiin a sawi a. Chutiang a nih loh chuan State Assembly thiah a ni mai a ti bawk.