BIHAR INTHLAN: CM turin mipuiin Yadav-a nge Kumar-a an dah san?

BIHAR INTHLAN: CM turin mipuiin Yadav-a nge Kumar-a an dah san?
Bihar assembly inthlan hun a hnai zel a, Rashtriya Janata Dal (RJD) hruaitu, Tejashwi Yadav chu eptu tangrual, Mahagathbandhan (INDIA) chuan chief minister atan an zuar a. Vikassheel Insaan Party (VIP) chief Mukesh Sahani chu deputy chief minister atan an ti lawk bawk.
Hetih lai hian eptuten an zawrh ber, Yadav-a hi Bihar mipuiin an state kaihruai tura an duh ber a ni em? JD(U) hruaitu, kum 2015 atang an state kaihruai tawh, Nitish Kumar-a zawk an la duh em?
Mipui ngaihdan lak pawh a tam a, heta langah chuan deputy chief minister hlui, Yadav-a dinhmun a tha rih zawk mek.
Thla hmasaa C-Voter opinion poll chuan Yadav-a hi mipuiin chief minister thutthleng luah tura an duh ber a ni a, 35.5%-in an thlang.
A hnuaiah hian Jan Suraaj Party dintu, Prashant Kishor-a awmin 23%-in an duh a. Chief Minister Kumar-a erawh chuan 16% chauhvin a thutthleng luah leh turin an duh.
JVC opinion poll chuan September thlaa mi ngaihdan a lakah Kumar-a chu hmahruaitu a ni ve thung a, 27%-in ‘chief minister atana zawrh atana hriat hlawh ber’ an ti a. Hetah hian Yadav-a chuan 25% a hmu ve phak bawk.
August thla khan Yadav-a hi JVC opinion poll-ah hian a chung berah a awm a, 30% velin RJD hruaitu hi an state kaihruai turin an duh.
Hetih hun lai hian Kumar-a hi pahnihna dinhmun hauhvin 23%-in an duh a. Kishor-a chu pathumnaah awmin 14%-in an thlang ve thung bawk.
Vote Vibe survey-in ngaihdan a lak, October thlaah khan Yadav-a hi chief minister atana duhtu an tam ber a, 35%-in an thlang a. 23.4%-in Kumar-a thlengin Kishor-a thlangtu 13.8% an awm bawk.
Bihar inthlan hi chuh ngei tura ngaih, Kishor-a chuan a chuh dawn lo tih a sawi chiang tawh a, hei vang hian tuna a lan danah chuan chief minister tur chu Kumar-a emaw, Yadav-a emaw ngei an ni dawn tih a chiang tawh.
Kishor-a hian kar hmasaah tawh khan inthlan a chuh loh tur thu hi a sawi a. A hma khan a party din, Jan Suraaj chuan Bihar assembly-a bial 243 awm chu an chuh vek dawn tih a lo sawi tawh thung.
PTI-in an kawmnaah Kishor-a chuan, “Kan party chuan keimah hi assembly inthlan chuh lo tur hian thu a titlu tawh a. Hei vang hian Raghopur bialah hian Tejashwi Yadav-a khing tur kan party mi mi dang kan dah ang,” a ti.
“Party-a a tam zawk duh dan anga he thu hi tihtluk a ni a. Kei hian ka chuh ve a nih chuan kan inrelbawlnaah buaina a awm thei ang,” a ti.
Bihar assembly inthlan hi thawh hnihin November thla hian neih a ni dawn a, November 6-ah a thawh khatna vote thlakin November 11-ah thawh hnihna neih a ni ang.
Inthlana vote tlate hi Nov. 14-ah chhiar a ni ang.
Tangrual chi hnih, NDA leh Mahagathbandhan chu inkhing ber tura ngaih an ni a. Kishor-a’n a din thar, Jan Suraaj chuan a vawi khat nan inthlan an chuh ve bawk ang.
Mahagathbandhan hi Yadav-a hova RJD kaihhruai an ni a. An zingah hian Congress, Deepankar Bhattacharya kaihhruai Communist Party of India (Marxist-Leninist) (CPI-ML), Communist Party of India (CPI), Communist Party of India (Marxist) (CPM) leh Sahani-a kaihhruai VIP an tel.
NDA-ah hian BJP, Janata Dal (United), Lok Janshakti Party (Ram Vilas), Hindustani Awam Morcha (Secular) leh Rashtriya Lok Morcha an tangho ve thung.