BIHAR INTHLAN: JSP & JDU intihbuainaah pakhat thi

On Nov 1, 2025 7 0

Bihar assembly inthlan hnai zelah Mokama bial chhung, Tartar khuaa Jan Suraj Party (JSP) leh Janata Dal (United) party worker-te an intihbuainaah mi pakhat a thi tih Ningani chawhnu khan police-in an sawi.
Patna Senior Superintendent of Police (SSP) office chuan buaina chhuak hi tlai dar 03:30 leh 03:40 inkar velah Ghoswari Police Station in-charge-in hriain Tartar khaw bulah party pahnih mite hi an intibuai niin a sawi a. Police hi thleng nghalin venhimna pawh khauh zawkin an kalpui nghal.
“Officer-te hian buaina chhuahna bula lirthei pathum pali vel inhung an hmu a, a hma darthlalang a keh vek a. Lirthei pakhat chhungah hian putar pakhat ruang an hmu a, kum 75 mi, Dular Chand Yadav-a, Tartar-a cheng a ni tih pawh hriat nghal a ni,” tiin officer pakhatin a sawi a. Thi hi thubuai pawh eng emaw zat nei a ni a, a thubuai neih zingah tualthah leh Arms Act bawhchhiatna pawh a tel niin an sawi.
JSP-in Mokama biala an candidate, Priyadarshi Piyush-a chuan campaign tura a kal laiin JD-U mite nen Tartar leh Basavanchak khuaah an intawk tih police a hrilh a. “Pawl hnih hi an inhmachhawn hnuah an inhnial buai a, lunga intawngin kut an inthlak zui ta a ni,” tiin officer chuan a sawi.
Hetih lai vel tho hian JD-U candidate Anant Singh-a leh a thuihhruaite chu Basavanchak khaw bulah beih an tawk tih an dawng bawk niin a sawi.
“Anant Singh-a chuan a mite nen hian leirawhchan leh lungin JSP miten an bei niin a sawi a, a worker zingah hliam tuar pawh an awm tih a sawi,” tiin officer chuan a sawi.
Buaina a chhuah hnuah hian Patna (Rural) SP chuan tlawh ve nghalin finfiahnate a en a, CCTV thla a lo lak fuhte pawh a la khawm nghal bawk.
Police chuan Yadav-a thih dan chu ‘thil rinhlelhawm tak’ a nih thu a sawi a. Dan leh thupek kenkawh erawh a pangngai lehnghal a, chhui hna thawk mek a ni tih an sawi.
Bihar-ah hian November 6 leh 11-ah member 243 awmna assembly inthlan tur niin campaign boruak pawh a sang tawh hle a. Buaina tenau leh inchirhthehna thawm hrang hrang hriat tur a awm deuh reng tawh a, vote tlate hi November 14-ah chhiar a ni ang.