BIHAR INTHLAN: Mahagathbandhan-in manifestor tlangzarh

BIHAR INTHLAN: Mahagathbandhan-in manifestor tlangzarh
Congress leh RJD kaihhruai, Mahagathbandhan chuan Thawhlehni khan Bihar assembly inthlan lo awm tura an manifesto, ‘Bihar ka Tejashwi Pran’ an tih chu an tlangzarh.
Congress hruaitu, Rahul Gandhi-a chuan manifesto tlangzarh hi a telpui lo va. Congress hruaitu lawk zingah Pawan Khera leh Deepender Hooda an tel thung.
INDIA tia an sawi bawk, eptu tangrualin chief minister atana an zawrh, RJD hruaitu, Tejwashwi Yadav-a chuan ‘Viksit Bihar’ hmuh a duh thu leh Bihar chu India-a No. 1 state-a siam an tum tih a sawi.
RJD hruaitu hian Chief Minister Nitish Kumar-a leh rorel lai, National Democratic Alliance (NDA) sawiselin Kumar-a chu BJP ‘kaihbu’ mai a nih thu a sawi.
“Nitish Kumar-a hi NDA kaihbu an lek a ni a. BJP hian Bihar chief minister hi hmathehah chauh an hmang a. Union Home Minister Amit Shah-a pawhin Kumar-a hi chief minister tur a ni kher lo tih a lo sawi tawh a. BJP hian inthlan zawhah hian chief minister nihtir an tum lo a ni,” a ti.
“INDIA tangrual chuan chief minister atan min zuar nghal a, NDA erawh chuan an chief minister tur puang tur hian vawi khat pawh thuthar lakhawmtute pawh an la kawm lo,” tiin Yadav-a hian a sawi a, NDA hian Bihar tan ruahmanna engmah an nei lo niin a sawi bawk.
“NDA hruaitute thu sawi in ngaihthlak thin chuan a tha lo lam zel an sawi ang… tute mahin Bihar hmalam panpuina tur an sawi ngai lo,” a ti.
“Vote ruk awm theihna kan ngaihven reng,” a ti a. “Kan hneh dawn a ni,” a ti bawk.
Mahagathbandhan-in deputy chief minister atana an zawrh, VIP chief Mukesh Sahani-a pawhin an tangrual chuan an intiam tihlawhtling vek dawn tih a sawi.
“Vawiin hian Bihar thar siam nan Sankalp Patra kan puang a. Kum 30-35 lo awm leh tur chhungin Bihar mipuite tan kan thawk ang a, mipuite duh hi kan pe dawn a. Vantlang hmaa kan intiamna hi kan tihlawhtling vek dawn a ni,” a ti.
Yadav-a chuan INDIA-in thuneihna an chang a nih chuan in tina member pakhat hnenah sorkar hna an pek tur thu a sawi a, “Lo ringhlel suh u,” a ti. Hetiang a nih theih nan hian sorkar an siam atanga ni 20 chhungin dan an siam dawn tih a sawi.
INDIA hian Old Pension Scheme (OPS) an hmang leh dawn tih an sawi a. Hmeithai leh upate hnenah thla tin Rs. 1,500 an pe ang a, kum tin Rs. 200-in a pung danw tih an sawi a. Rualbanlote tan thla tin Rs. 3,000 pek an tum bawk.
Sorkarin acre 2,000-a zauvah ‘educational city’ an din dawn a. Competitive examination-ah fee an lak dawn loh bakah exam hmachhawnte zinna senso an tumsak dawn a. Hmeichhe college leh degree college an din dawn bawk.
Scheduled caste (SC) leh Scheduled tribe (ST) zirlai 200 chuang zirna sang zir turin ram pawna thawn an tum bawk.
Mai-Behin Maan Yojana hnuaiah hmeichhiate chu Devember 1 atangin thla tin Rs. 2,500 pek an tiam a, kum nga lo awm leh tur chhungin Rs. 30,000 an pe dawn tih an sawi.
Lo neitute chu an thlai tharah minimum support price pek an tiam a, Mandi leh Market Committee ennawnin Mandi hi divisional, subdivision leh block level committee din an tum.
Mi tinin a thlawna health insurance Rs. nuai 25 thleng an lak theihna tur Jan Swasthya Suraksha Yojana an siam dawn bawk.