BIHAR INTHLAN: Vote 64.66% tlain state record thar siam

BIHAR INTHLAN: Vote 64.66% tlain state record thar siam
Ningani khan Bihar assembly inthlan thawh khatna atan vote thlak a ni ta a, hriat theih chinah vote 64.66% a tla a, an state chanchina vote a tlak that ber tum a ni.
Bihar assembly inthlana vote a thlak that ber tum chu kum 2000-a 62.57% a tlak kha a ni a. Lok Sabha-ah chuan kum 1998 khan 64.6% a lo tla tawh a. Chief Election Commissioner Gyanesh Kumar-a chuan vote thlak an tam leh thawktute inpeknaah lawm thu a sawi.
ECI tan chuan vote thlak an tam hi a lawmawm a, a hmain special intensive revision (SIR) kalpui niin hei hi eptuten an sawisel nasat em a, hetiang kara vote a tla tha hi an tan chuan a lawmawm hle a ni.
Kum 2010 inthlanah khan Nitish Kumar-a kaihhruai Janata Dal United (JDU) chu BJP nen tang dunin hnehna an chang chiah hle a, hemi tum hian vote 52.73% tlain JDU hian bial 115 an la.
Kum 2015 inthlan hma khan a thawhpui thlakin Lalu Yadav-a kaihhruai, Rashtriya Janata Dal (RJD) a thawhpui leh a, hemi tum hian vote tla hi a hma aiin 4.18%-a tam zawkin Kumar-Yadav tang dun hian hnehna an chang.
Kum nga hnuah Kumar-a hian a thawhpui thlak lehin BJP a tanpui leh a, hnehna chang lehin JDU bial lakzat erawh 28-in a tlem ta zawk thung a. Hemi tum hian vote tla 57.29 niin a hma chiah aiin 0.38%-in a tla tam zawk.
Kum 2025 inthlan thawh khatnaah hian kum 2020-a tla aiin 7.37%-in a tam zawk a, hemi tuma thawh khatna aiin 8.46%-in a tla tam zawk bawk a, hemi tum hian thawh khatnaah 56.2% a tla.
Inthlan leh politics-a mi thiamte chuan vote tla tha hi eptu tan tha niin an ngai a, Congress leh Tejashwi Yadav kaihhruai, RJD tan chanchin lawmawm ni tura ngaih a ni a. Hnehna an chan chuan Yadav-a hi eptu tangrual, Mahagathbandhan chuan chief minister an nihtir dawn a ni.
Hetih lai hian vote tla tha hi sorkar lai ninna tihlanna a ni ngawt lo tih erawh tun hma lam inthlanah a lo lang tawh a. Chhattisgarh-ah kum 2008 leh 2013 inthlanah khan vote tla hi 7%-in an intam hleih a; mahse, BJP an chak ve ve tho va. Madhya Pradesh-ah pawh kum 2003 leh 2013 khan vote tla a hmasaa 67.25% leh 72.07% niin inthlau hle mah se BJP an chak tho.
Ninganiah hian bial 243 awmah 121-ah inthlan a ni a, 122 dang hi November 11-ah inthlan a ni ve dawn thung a, November 14-ah chhiar a ni ang.
Thawh khatnaa chuhtu langsar zingah Yadav-a a tel a. An chhungkaw chakna, a pa, Lalu leh a nu, Rabri Devi te vawi kua inthlana vawi sarih an chakna, Raghopur-ah a ding a. He bial hi Yadav-a hian kum 2015 atangin a lo thut tawh a ni.
Thawh khatnaah hian Tarapur-ah deputy chief minister, BJP state unit boss Samrat Choudhary pawh a ding a. Alinagar-ah hnam hla sa thiam lar, BJP candidate Maithili Thakur-i a ding bawk.
Kum 2020 inthlana khan RJD hi party mala bial la tam ber niin MLA 75 an nei a, BJP aiin pakhatin an ngah a. JDU chu pathumna niin 43 leh Congress-in 28 an chang bawk.