BIHAR INTHLAN: Vote a tla tha, NDA chak rinna a lian

BIHAR INTHLAN: Vote a tla tha, NDA chak rinna a lian
Bihar assembly inthlan thawh hnihna, Thawhlehnia mipuiin vote an thlakah vote 67.14% a tla a, a tlak that ber tum a ni a. Exit poll hrang hrangah sorkar lai, NDA chu an chak tura rin a ni bawk.
Kum 1951-a Bihar inthlan atangin tun hi vote thlak an tam ber tum niin an state Chief Electoral Officer (CEO) Vinod Gunjiyal-a chuan a sawi.
Vote thlak hun a tawp ruala exit poll lak hrang hrangah chuan BJP leh Chief Minister Nitish Kumar-a kaihhruai JD(U) tanhona, NDA chuan bial 243 awmah bial 122 an lak phak ngei rin a ni a. RJD kaihhruai eptu tangrual, Mahagathbandhan chu 100 leh a aia tlem hret la tura rin an ni thung.
Exit poll hian a vawi khat nana inthlan chuh, Prashant Kishor-a kaihhruai, Jan Suraaj chuan bial 10 an lak tlin a rinawm loh niin an tar lang.
Dainik Bhaskar chuan NFA hian bial 145-160 an lak a rinawm tih a sawi a, Mahagathbandhan-in bial 73-91 leh a dangten bial 5-7 an la turah a dah a. Times Now-JVC chuan NDA-in bial 135-150, Mahagathbandhan-in 88-103 leh a dangten 3-6 an la turin a dah ve thung.
IANS-Matrize chuan NDA-in bial 147-167, Mahagathbandhan-in 70-90 leh a dangten 2-8 an la dawn niin as awi lawk a. P-Marq chuan NDA lak turah bial 142-162 a dah a, Mahagathbandhan-in 80-98 leh a dangten 0-3 la turin a dah bawk.
Inthlan thawh hnihnaah hian district 20-a bial 122-ah mipuiin vte thlak a ni a. NDA leh eptu tangrual inbeih nasatna – Seemanchal, Champaran leh Magadh ram bial pawh a tel.
Bihar CEO pisa chuan Muslim tamna, Seemanchal-ah vote tla tha berin chawhrualin 73.77% a tla niin a sawi a. He ram bialah hian Kishanganj (76.26%), Katihar (75.23%), Purnia (73.79%) leh Araria (67.79%) district-ah a tla tam zual.
Champaran-ah 69.17% tlain Purvi Champaran (69.31%) leh Paschim Champaran (69.02%) district-ah a tla tam zual.
Ang ram bialah Bhagalpur (66.03%), Banka (68.91%) leh Jamui (67.81%) awmin vote tla zat chawhrual hi 67.58% a tling.
Mithilanchal-a Supaul (70.69%), Sheohar (67.31%), Sitamarhi (65.29%) leh Madhubani (61.79%) district-ah a tla tha vek a, chawhrualin 66.77% a tla.
Magadh chu a ram bial anga vote tlak tlemna ber niin 63.30% a tla a, Shahabad-ah 63.96% a tla bawk a. Heng ram bial pahnih hi Mahagathbandhan thatna a ni.
Inthlanna bial 122 hi Bihar leh Nepal, West Bengal, leh Jharkhand inrina bawra mi deuh vek an ni a, heng hmunah hian kum 2020 inthlanah khan BJP-in bial an la tam zawk a, sorkarna an chan theih phahna kha a ni tel.
Inthlan thuneitute chuan vote tla tha ta anga a lan chan hi Election Commission (EC)-in Special Intensive Revision (SIR) a kalpuiah dik lo taka vote nei mi nuai 65 chuang a paih vang a ni pakhat tih an sawi a. “Hmun hniha vote nei te, a tak awm lo vote nei ang chi kha a awm tawh lo va, voter list dik leh changtlung zawk a awm tawh vang a ni thei,” tiin thuneitu pakhat chuan a sawi.
Ningani kal taa district 18-abial 123 inthlanah khan vote 65.08% a lo tla tawh bawk a, heng bialah hian kum 2020 kha chuan 57.29% chauh a tla a ni.
Thawh hniha vote tlate hi Zirtawpni hian chhiar a ni ang.
EC chuan inthlan a muanawm niin an sawi a. Buaina chhuak thei vengin Central Armed Police Forces (CAPF) company 1,500, Bihar Military Police company 50 leh police 45,000 chuang duty an awm.