Biles kutah Olympic gold pathum lut tling ta

American gymnast Simone Biles chuan Inrinni khan Bercy Arena, Paris-ah Olympic Gams kal laia a gold medal pathum a hlawhchhuak leh ta a, Olympics Artistic Gymnastics women’s Vault final-ah 15.300 average score chungin Olympic gymnastics chanchina gymnast ropui a nihna a nemnghet leh sauh.
A hma lawkin Biles hian USA chu women’s team gold lakpuiin, a hnuah all-around title a hlawhchhuak leh a, tunah Rio 2016-a sualchhuah, Tokyo-a a hloh leh tak kha Paris-ah a lakir leh ta a ni.
Vaul final-a kum 27 Biles el pha teuh ber Brazil gymnast Rebeca Andrade pawhin Tokyo-a a title lak kha Biles lakah hlohin point 14.966 nen silver a lungawipui a ngai ve ta thung a; point 14.466 khawl tling chungin American Jade Carey kutah bronze medal a lut ve thung.
Olympic medal 10 awrh tawha Thawhtannia final dang pahnih hmachhawn tur la nei cheu Biles hi hmeichhe gymnast piang chhuak tawha hlawhtlingber pathumna niin, floor leh beam-ah hian a chak leh a nih chuan kum 1960 leh 1968 inkara Czechoslovakia tana Olympic medal 11 la tling Vera Caslavska chu Olympic chanchina gymnastics medal lak tam lamah a lehpel tawh dawn a; all-time record siama medal 18 la tling Soviet Union gymnast Larisa Latynina tluk tur erawh chuan hmabak a la nei.