Bill Gates-a’n a fate tana tha zawk tur a nih ringin ro a hnutchhiah dawn mang lo

Bill Gates-a’n a fate tana tha zawk tur a nih ringin ro a hnutchhiah dawn mang lo
Khawvela pahausa ber ni thin, tunah pawh hausa zual top 5-a a la lang pha Bill Gates chuan a nupui then tak Melinda French Gates nena an fate pathum chu ro a hnutchhiah mang dawn lo niin a sawi a, ro tam tak hnutchhiah chu a fate tan a tha lo zawk dawna a hriat thu a sawi.
Bill Gates hian fa pathum- Jennifer, kum 28, Rory, kum 25, leh Phoebe, kum 22, te neiin, mi nawlpui chuan ro khawm tur an ngah dawn viauin kan lo ngai a ni mai thei, mahse, Bill Gates chuan Figuring Out with Raj Shamani podcast-ah a fate ro khawm tir a tum lem loh thu hi sawiin, “Hetiang lamah hi chuan tupawhin thutlukna kan siam vek a ngai a. Keimaha hi chuan ka fate tan seilenna le zirna tha tak ka pe tawh a, a hausakna atang hi chuan za zela pakhat pawh an chang meuh lo ang,” a ti.
Heti chung hian Bill Gates faten a sum faia ro an khawm theih hi a la theuneu lo khawp mai a, Forbes-in a tarlan danin 2025-ah hian Bill Gates hausakna hi dollar tluklehdingawn 108 angin an chhut a, chuta tanga za zela pakhat pawh a fate hian dawng dawn se dollar tluklehdingawn chu a la tling tho mai!
Bill Gates chuan chu aia tam a fate ro khawm tur hnutchhiah chu, “An tan a tha lo zawk ang,” a ti tlat. “Inthlah chhawn lam thil a ni lo. Microsoft hi rawn enkawl zui turin ka ti lem lo. Anmahni kut kawih ngeia sum hai luh a, an hlawhtlinna tur chance pek ka duh zawk a, vanneihna leh ka ro sumin an theihna a hliah khuh ka duh lo,” a ti bawk.
Bill Gates chuan faten nu leh pate hmangaihna leh chhawmdawlna an tliar hran thiam pawimawh a tih thu a sawi a, “Chuvangin kan philosophy hi a rang lama hriat thiam tir a, an zavaiin ang khat vekin kan en a, remchanna pawh ang khatin kan pe tih hriattir a pawimawh, chutihrualin heng rosum zo zai te hi chu foundation kal tlanga a mamawh ngawih ngawihtu te hnen thlentir hi a pawimawh ber chu a ni,” a ti bawk.