Billboard 200-ah Drake ‘For All the Dogs’ a No.1 leh ta

Billboard 200-ah Drake ‘For All the Dogs’ a No.1 leh ta
Drake album ‘For All the Dogs’ chu Billboard 200 (albums) chart-ah a No.1 a, a zawn ni lova he chart-a kar hnih a No.1-na a ni. Hetihrual hian Dolly Parton album tar ‘Rockstar’ leh ENHYPEN ‘Dark Blood’ te pawh chart top 10-ah an debut.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belh khawm thin a ni.
Drake ‘For All the Dogs’ hi 1,45,000 hralh lehin, chung zinga 1,41,500 chu streaming atanga album tlukpui (on-demand official US stream maktaduai 190.23) niin, album tak tak hralh chu 2,000 a ni a, album-a hla mal hralh atangin 1,500 a tling thei bawk.
He album hi November ni 17 khan a deluxe version, hla thar paruk dah belhin a tlangzarh nawn leh a, a album hmingah hian ‘For All the Dogs Scary Hours Edition’ a ti a, album thar ni mah se a tlangzarh hmasak zawk nen a hralhna hi belh khawm a ni a, chart-ah No.4 atangin No.1 a kai thar leh ta a ni.
Chart No.1 hlui Taylor Swuft ‘1989 (Taylor’s Version)’ chu 1,38,000 hralh lehin No.2-ah bawk a la awm.
Dolly Parton album thar, a rock album hmasa ber ‘Rockstar’ chu 1,28,000 hralhin No.3-ah a debut a, he chart-a Parton album thleng sang ber a la ni a, chart top 10-a lang thei album pathum a neihna a ni bawk. He album-a Parton album chart top 10-a lang tawh te chu 2014-ah ‘Blue Smoke’ (No.6) leh 1987-a Linda Ronstadt leh Emmylou Harris te nena an album intawm ‘Trio’ (No.6) te an ni.
Rockstar hi album tak tak hralh zat chu 1,18,500 niin, streaming atangin 8,000 leh album-a hla mal hralhna atangin 1,500 a tling thei. He album hi hla 30 awmna niin, hla hlui a cover leh hla thar a dah khawm a, zaithiam hrang hrang 40 rual a thawhpui a, chung zingah chuan Pat Benatar, Miley Cyrus, Melissa Etheridge, Joan Jett and the Blackhearts, Elton John, Lynyrd Skynyrd, Paul McCartney, Stevie Nicks, Chris Stapleton, Ringo Starr, Sting leh Steven Tyler te pawh an tel.
ENHYPEN album thar ‘Orange Blood’ chu 90,000 hralhin No.4-ah a debut a, he chart top 10-a lang thei album pathum an neihna a ni. He Korean pop group hian kumin June khan an album ‘Dark Blood’ chu No.4 kai puiin, nikum khan an album ‘Manifesto: Day 1’ chu No.6 an lo kaipui tawh bawk.
Chart top 10 a lang dang te chu chart No.1 hlui vek niin, Morgan Wallen ‘One Thing at a Time’ chu 68,000 hralh lehin No.5-ah bawk a la awm a, Taylor Swift ‘Midnights’ chu 56,000 hralh lehin No.7 atangin No.6 a kai thar leh a, Stary Kids ‘ROCK-STAR’ chu 51,000 hralh lehin No.1 atangin No.7-ah a tawlh a, Taylor Swift ‘Folklore’ chu 45,000 hralh lehin No.18 atangin No.9 a kai thar leh a, SZA ‘SOS’ chu 44,000 hralh lehin No.12 atangin No.10 a kai thar ve leh ta bawk.