Billboard 200-ah record siamin Morgan Wallen ‘One Thing at a Time’ album a No.1

On Feb 7, 2024 10 0

Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-a a No.1 tawh zawng zawng belhkhawm chu kar 18 a tling ta a, Garth Brooks album “Ropin’ the Wind” record nihrualin, country album zinga Billboard 200 chart-a No.1 ni rei thei ber a ni ta. Rpoin’ the Wind album hi 1991-92 khan a zawn ni kher lovin kar 18 chhung he chart-ah hian a lo No.1 tawh a ni.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
One Thing at a Time hi kar khat chhungin 66,000 hralh lehin, No.2 atangin No.1-ah a invawrh thar leh a, he album hi March 2023 khan chart No.1-ah a debut a, a zawnin kar 12 chhungin a No.1 zui a, chumi hnuah No.1 atanga tawlhin, June thla tawp lah July thla chawhma lamah a zawnin kar thum a No.1 leh a, October-ah kar khat No.1 lehin, January-ah tum khat a No.1 leh a, tunah No.1 a kai thar leh ta a ni. He album hi chart-ah kar 48 chhung a zawnin a lang tawh a, hetih chhung hian chart No.6 aia hniamah a la awm ngai lo.
One Thing at a Time an hralh zawng zawng 66,000 atanga 64,000 cu streaming atanga album hralhna tlukpui (on-demand official stream maktaduai 87.32) niin, album tak tak hralh zat chu 1,500 a ni a, album-a hla mal hralhna atangin 500 a tling thei bawk.
Billboard 200 chart-a album No.1 ni rei ber chu ‘West Side Story’ soundtrack niin, 1962-63 chhungin kar 54 a No.1 thei a, Michael Jackson ‘Thriller’ (1983-84, kar 37), Fleetwood Mac ‘Rumours’ (1977 (kar 31), ‘South Pacific’ soundtrack (1958-59, kar 31), Harry Belafonte ‘Calypso’ (1956-57, kar 31), Adele ‘21’ (2011-12, kar 24), Prince and The Revolution ‘Purple Rain’ soundtrack (1984-85, kar 24), ‘Saturday Night Fever’ soundtrack (1978, kar 24), M.C. Hammer ‘Please Hammer Don’t Hurt ‘Em’ (1990, kar 21), Whitney Houston ‘The Bodyguard’ soundtrack (1992-93, kar 20), Elvis Presley ‘Blue Hawaii’ soundtrack (1961-62, kar 20), Morgan Wallen ‘One Thing at a Time’ (2023-24, kar 18), Garth Brooks “Ropin’ the Wind’ (1991-92, kar 18), ‘Dirty Dancing’ soundtrack (1987-88, kar 18) leh The Monkees ‘More of the Monkees’ (1967, kar 18) ten an dawt.
Chart No.1 hlui 21 Savage ‘American Dream’ chu 61,000 hralh lehin No.1 atangin No.2-ah a tawlh a, chart No.1 hlui bawk Drake “For All the Dogs” chu 51,000 hralh lehin No.3-a bawk a la awm.
Tun kar chart ranking a chart No.1 la ni ngai lo lang awm chhun chunNoah Kahan ‘Stick Season’ niin, 47,000 hralh lehin No.5 atangin No.4-ah a insawn ve ta.
Chart top 10-a lang dang zawng chu chart topper lo ni ve tawh an ni a, Taylor Swift ‘1989 (Taylor’s Version)’ chu 45,000 hralh lehin No.6 atangin No.5-ah a insawn thar leh a, SZA ‘SOS’ chu 42,000 hralh lein No.7 atangin No.6-ah a insawn a, Taylor Swift ‘Lover’ chu 40,000 hralh lehin No.10 atangin No.7-ah a insawn a, Zach Bryan self-title album chu 40,000 tling lo deuh hralh lehin No.9 atangin No.8-ah a insawn a, Taylor Swift ‘Midnights’ chu 38,000 hralh lehin No.11 atangin No.9-ah a kai thar leh a, Morgan Wallen ‘Dangerous: The Double Album’ chu 37,000 hralh lehin No.13 atangin No.10 a kai thar ve leh ta bawk.