Megan Thee Stallion ‘Hiss’ a Hot ber

Megan Thee Stallion hla thar ‘Hiss’ chu kar khat chhunga US-a hla lar ber niin, Billboard Hot 100 (singles) chart No.1-ah a debut a, he rapper hian Hot 100 chart-a No.1 kai thei hla pathum a nei tling ta a, 2020 khan Beyonce a thawhpuina ‘Savage’ chu May thlaah No.1 kai tawhin, Cardi B nena an thawh dunna ‘WAP’ chu hemi kum August thlaa a No.1 tawh bawk. Hetihrual hian singer-songwriter Benson Boone pawhin a vawi khat Hot 100 chart top 10 kai thei hla a nei ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni. ‘Hiss’ hian kar khat chhungin stream maktaduai 29.2 leh sales 1,04,000 a tlin thei a, radio airplay-ah pawh ngaithlatu maktaduai 2.9 a nei thei bawk a, hei hi chart-ah a No.1 pui ta a ni.
Chart No.1 hlui Jack Harlow “Lovin’ on Me’ chu No.1 atangin No.2-ah a tawlh a, chart No.1 hlui bawk Taylor Swift ‘Cruel Summer’ chu No.2 atangin No.3-ah a tawlh a, Teddy Swims ‘Lose Control’ chu No.4-ah bawk awm lehin, Tate McRae “Greedy” chu No.3 atangin No.5-ah a tawlh ta bawk.
Zach Bryan “I Remember Everything” featuring Kacey Musgraves chu No.5 atangin No.6-ah a tawlh a, Doja Cat “Agora Hills” chu No.7-ah bawk a la awm.
Benson Boone ‘Beautiful Things’ chu stream maktaduai 18.5, radio airplay 8,00,000 leh sales 8,000 tlingin No.15 atangin No.8 a kai ve ta a, Benson Boone tan he chart top 10 a lang thei hla a neih vawi khatna a ni.
21 Savage ‘Redrum’ chu No.10 atangin No.9-ah a insawn a, SZA ‘Snooze’ chu No.9 atangin No.10-ah a tawlh ve ta bawk.