Billboard 200-ah Taylor Swift ‘TTPD’ a la No.1
Taylor Swift album ‘The Tortured Poets Department’ chu Billboard 200 (albums) chart-ah a No.1 a, he chart-ah hian a zawnin kar thum a No.1 ta a, 2020-a a album he chart-a a zawna kar ruk No.1 thei ‘Folklore’ hnua Swift album he chart-a No.1 ni rei ber a ni. Folklore leh TTPD inkarah hian Swift hian No.1 album paruk a nei hman.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming leh album-a hla mal hralhna atanga album tlukpui te belhkhawm thin a ni.
Taylor Swift ‘TTPD’ chu kar khat chhungin US-ah 2,82,000 an hralh leh a, chung zinga 2,29,500 chu streaming atanga album tlukpui (on-demand official stream maktaduai 298.33) niin, album tak tak hralh chu 51,000 a ni a, album-a hla mal hralhna atangin 1,500 a tling thei bawk.
Tihian Billboard 200 chart-a Swift album hrang hrang No.1 tawh zawng zawng rei zawng belhkhawm chu kar 72 a tling ta a, soloist zinga he chart-a No.1 ni rei ber a nihna a sawhnghet leh ta sauh a, amah hnaih bertu chu Elvis Presley (kar 67) a ni. Swift hian No.1 kai thei album 14 a nei tling tawh a, Jay-Z nen soloist zinga he chart-a No.1 album ngah ber an ni dun mek bawk.
Dua Lipa album thar ‘Radical Optimism’ chu 83,000 hralhin No.2-ah a debut a, he chart-a a thlen sân ber a la ni. A album hralh hi 51,500 chu album tak tak hralh zat niin, streaming atangin 30,500 (on-demand official stream maktaduai 39.7) leh album-a hla mal hralhna atangin 1,000 a tling thei bawk. Dua Lipa hian he chart top 10-a lang thei album pahnih a nei ta a, a album hmasa leh a album pahnihna ni bawk 2020-a a tlangzarh Nostalgia khan chart No.3 a lo kai tawh a ni.
Chart No.1 hlui Morgan Wallen ‘One Thing at a Time’chu 71,000 hralh lehin No.2 atangin No.3-ah a tawlh a, chart No.1 hlui bawk Future leh Metro Boomin ‘We Don’t Trust You’ chu 61,000 hralh lehin No.3 atangin No.4-ah a tawlh ta bawk.
K-pop group SEVENTEEN album thar ‘17 is Right Here’ chu 53,000 hralhin No.5-ah a debut a, he chart top 10-a lang thei album panga an neihna a ni ta. Album hralh zinga 49,000 chu album tak tak hralhna niin, streaming atangin 4,000 (on-demand official stream maktaduai 5.5) a tling bawk.
Chart No.1 hlui, Ye (Kenye West ni thin kha) leh Ty Dolla Sign ‘Vultures 1’ chu 45,000 hralh lehin No.52 atangin No.6-ah a invawrh thar leh a, he album hi a vinyl an tlangzarh thar avangin hralh a kal leh ta deuh a ni.
Chart No.1 hlui Morgan Wallen ‘Dangerous: The Double Album’ chu 42,000 hralh lehin No.6 atangin No.7-ah a tawlh a, chart No.1 hlui bawk Beyonce ‘Cowboy Carter’ chu 41,000 hralh lehin No.4 atangin No.8-ah a tawlh a, Noah Kahan ‘Stick Season’ chu 40,000 hralh lehin No.5 atangin No.9-ah a tawlh a, chart No.1 hlui SZA ‘SOS’ chu 39,000 hralh lehin No.9 atangin No.10-ah a tawlh ta bawk.
Billboard 200-ah Taylor Swift ‘TTPD’ a la No.1
Get real time updates directly on you device, subscribe now.
Prev Post