Billboard 200-ah Zach Bryan ‘With Heaven on Top’ a No.1

On Jan 20, 2026 2 0

Billboard 200-ah Zach Bryan ‘With Heaven on Top’ a No.1
Zach Bryan album thar ‘With Heaven on Top’ chu Billboard 200 (US albums) chart No.1-ah a debut a, he chart-a a album No.1 kai thei pahnihna a ni. Hetihrual hian The Kid LAROI album thar ‘Before I Forget’ pawh top 10-ah a debut.
Billboard 200 chart hi kar khat chhunga US-a album lar dan tehna niin, chart ranking hi kar khat chhunga US-a album hralh tam dan atanga tehin siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Zach Bryan “With Heaven on Top” hi kar khat chhungin 1,34,000 an hralh a, chung zinga 1,27,000 chu streaming atanga album hralh tlukpui (on-demand official stream maktaduai 130.32) niin, album tak tak hralh chu 6,000 a ni a, hla mal hralhna atangin 1,000 a tling thei bawk.
‘With Heaven on Top’ album-ah hian hla 25 awmin, 2023 khan a self-titled album ‘Zach Bryan’ chu a lo No.1 pui tawh bawka, tihian No.1 album pahnih a nei tling ta a, he chart a top 10 kai thei album panga a neihna a ni bawk.
Chart No.1 hlui Morgan Wallen “I’m the Problem” chu 82,000 hralh lehin No.1 atangin No.2-ah a tawlh a, tihian chart No.1 leh No.2-te hi country album ve ve niin, tun kum hnih chhunga country album-in hetiang dinhmun an tawn vawi khatna a ni. “I’m the Problem” album hi May 2025-a a tlangzarh tawh kha niin, chart No.1-ah a debut a, tun thlengin chart top 10-ah a la lang ta reng a ni.
Olivia Dean ‘The Art of Loving’ chu 64,000 hralh lehin No.3-ah bawk a la awm a, chart No.1 hlui Taylor Swift ‘The Life of a Showgirl’ chu 63,000 hralh lehin No.2 atangin No.4-ah a tawlh a, chart No.1 hlui bawk KPop Demon Hunter soundtrack chu 56,000 hralh lehin No.4 atangin No.5-ah a tawlh ta bawk.
The Kid LAROI album thar ‘Before I Forget’ chu 41,000 hralh lehin, chung zinga 30,000 chu streaming (on-demand official stream maktaduai 30.83) atanga album hralh tlukpui niin, album tak tak hralh chu 11,000 a ni bawk a, chart No.6-ah a debut a, a top 10 album pahnihna a ni.
Chart top 10 a lang dang zawng chu he chart-a No.1 lo ni tawh vek niin, SZA ‘SOS’ chu 40,000 hralhin No.6 atangin No.7-ah a tawlh a, Tate McRae ‘So Close To What’ chu 40,000 tling lo deuh hralh lehin No.5 atangin No.8-ah a tawlh a, Morgan Wallen “One Thing at a Time” chu 36,000 hralh lehin No.8 atangin No.9-ah a tawlh a, Sabrina Carpenter “Man’s Best Friend” chu 33,000 hralh lehin No.7 atangin No.10-ah a tawlh ta bawk.