2022-ah a hla TikTok-ah a viral a, kuminah Grammy a vawi khat nan a dawng bawk a, a album ‘SOS’ chu Billboard 200 (albums) chart-ah kar sarih a No.1 bawk. SZA chu Billboard-in 2023 Woman of the Year-ah an puang a, a awm ving veng khawp mai. He chawimawina hi Billboard Women in Music Awards, March ni 1-a YouTube Theater, Hollywood Park, Los Angeles-a an sem hunah an hlan ang.
-- Advertisement --
Billboard editorial director Hannah Karp chuan, “2017-a rimawi khawvela a rawn inpho chhuah atang khan SZA hian genre hrang hrang kal pelin, hla puitam tak tak a tichhuak a, Billboard chart-ah pawh a hla te hi an langsar hle a ni. A album pahnihna ‘SOS’ a thlang kan contemporary R&B-ah a huhang a rawn tina lehzual a, superstar-ah a hlangkai ta a ni. Woman of the Year chawimawi pawh hi hlan thuai thuai kan chak tawh hle a ni,” a ti.
2017 khan SZA ian a label changtlung pangngai bel fuhin, a album ‘Ctrl’ a tlangzarh a, a hla phuah dan danglam tak mai leh a aw danglam tak mai chuan ngainat a hlawh a, a debut album hi Billboard Top R&B Albums-ah No.1 kaiin, Top R&B/Hip Hop Albums-ah No.2 a kai a, Billboard 200 (albums) chart-ah pawh No.3 a kai a, he album hi RIAA certified 3x platinum a kai bawk. Ctrl hi a tlangzarh atanga vawiin thlengin Billboard 200 chart-ah a la lang pha reng a, mihang hmeichhe artist zingah he chart-a album lang rei thei ber record a siam nghe nghe a ni.
SZA hian Grammy pawh best pop duo/ group performance chu Doja Cat nena an zai dunna ‘Kiss Me More’ avangin a dawng a, 2019 Billboard Women in Music Awards-ah pawh Rulebreaker Award a dawng tawh bawk.
December ni 9, 2022 khan a album pahnihna ‘SOS’ a tlangzarh leh a, Billboars 200-ah No.1 a kai a, he chart-a No.1 kai thei album a neih vawi khatna a ni. He album hi a tlangzarh atanga kar khat chhungin US-ah stream maktaduai 400 a tling a, hmeichhe zaithiam album kar khat chunga stream nasat ber dawttu a ni pha.
Kumin Billboard Women in Music-ah Woman of the Year chawimawi hi Olivia Rodrigo (2022), Cardi B (2020), Billie Eilish (2019), Ariana Grande (2018), Selena Gomez (2017), Madonna (2016), Lady Gaga (2015) leh Taylor Swift (2014) te pawhin an lo dawng tawh a ni.