Billboard Hot 100-ah Alex Warren ‘Ordinary’ a la No.1
Billboard Hot 100-ah Alex Warren ‘Ordinary’ a la No.1
Alex Warren hla hit ‘Ordinary’ chu Billboard Hot 100 (singles) chart-ah a No.1 a, he chart-ah hian kar nga a No.1 tling ta. Hetihrual hian Morgan Wallen pawh top 10-ah hla pathum bawk a la nei a, a zawnin kar nga chhung chu chart top 10-ah hla pathum tal a la nei ziah a ni a, Kendrick Lamar record a nihrual ta a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio & official video), radio airplay leh sales data te chu tehna pawimawh a ni.
Alex Warren ‘Ordinary’ hian kar khat chhungin stream maktaduai 20.2 leh sales 7,000 a la nei thei a, radio airplay pawh ngaithlatu maktaduai 69.7 an la tling a, hei hi a kar nga nan chart-ah a No.1 pui leh ta a ni.
Morgan Wallen hla, chart No.1 pawh lo ni tawh ‘What I Want’ featuring Tate McRae-in stream maktaduai 22.8 a la nei thei a, chart No.2-ah bawk awm lehin, Wallen hla dang, chart No.2 pawh lo ni tawh ‘Just in Case’ chu No.4 atangin No.3 a kai thar leh a, a hla dang “I’m the Problem” chu No.5-ah a la awm bawk.
Morgan Wallen hian kumin chart top 10-ah kar nga chhung chu hla pathum a nei tling thei a, Kendrick Lamar record, soloist zinga kum khat chhunga chart top 10-a tum khata hla pathum chin nei tam ber record a rawn nihrual ta a ni. Soloist chauh ni loah cuan Beatles-in 1964-a kar riat chhunga chart top 10-a hla pathum chin lang thei an neih chu tuman an la tluk pha lo.
Hot 100 chart-a kar 19 No.1 ni thei, he chart-a No.1 ni rei ber record nihrualtu Shaboozey ‘A Bar Song (Tipsy)’ chu No.7 atangin No.4 a kai thar leh a, he chart-a kar 13 No.1 ni thei Kendrick Lamar leh SZA ‘Luther’ chu No.6-ah bawk awm lehin, chart No.1 hlui bawk Sabrina Carpenter ‘Manchild’ chu No.3 atangin No.7-ah a tawlh ve thung.
Chart No.1 hlui Teddy Swims ‘Lose Control’ chu No.9 atangin No.8-ah a insawn leh hret a, he hla hi chart top 10-ah kar 68 lang tawhin, he chart top 10-a lang rei ber record a siam chu a sawhnghet telh telh a, top 10 pawn lama a lan zawng zawng nen pawh he chart-a a lan rei zawng hi kar 98 tling tawhin, Hot 100 history-a chart a lang rei ber a ni tawh bawk.
Chart No.1 hlui Lady Gaga leh Bruno Mars ‘Die With a Smile’ chu No.8 atangin No.9-ah a tawlh a, top 10 atanga chhuak tawh, Chappell Roan ‘Pink Pony Club’ chu No.11 atangin No.10 a kaithar ve leh ta bawk.