Billie Eilish-i’n 100M Monthly Spotify listener a nei

‘Happier’ hla a sak thin kha tun hi a sak nawn leh hun tak a ni ngei ang, Billie Eilish chu zaithiam zingah Spotify-a thlakhata a hla vawi maktaduai 100 chuang ngaihthlak hlawh thei pathumna a ni ta. Chuta pawh a hla Spotify-a stream tura an dah hi hla 82 chiah a ni lehnghala, he streaming service-a 100 million monthly listener neih nana hla nei tlem ber record a siam bawk. Billie Eilish hi kum 22 mi chauh a la ni lehnghal a, Spotify-a 100 million monthly listener nei thei naupang ber record a siam bawk.
Spotify-a monthly listener ngah ber chu The Weeknd niin, 107 million monthly listener a nei theia, pahnihna chu Taylor Swift niin, 102 million monthly listener a nei thei bawk a, heng zaithiam pahnih te hian Billie Eilish aiin Spotify-ah hla stream theih hi a letin an ngah zawk thung.
Billie Eilish hian Spotify-a hian vawi tluklehdingawn stream hlawh thei hla pariat a nei mek a, Khalid nena an zai dunna ‘Lovely’ chuan vawi tluklehdingawn 2.8 chuang stream a hlawh tawh a, ‘Bad Guy’ (tluklehdingawn 2.5), ‘When the Party’s Over’ (tluklehdingawn 1.8), ‘Everything I Wanted’ (tluklehdingawn 1.6), ‘Ocean Eyes’ (tluklehdingawn 1.4), ‘Happier Than Ever’ (tluklehdingawn 1.3), ‘Idontwannabeyouanymore’ (tluklehdingawn 1.09) leh ‘Bury a Friend’ (tluklehdingawn 1.01) te a nei tawh bawk.
A debut single ‘Ocean Eyes’ chu 2018 khan tlangzarhin, Billboard Hot 100 (singles) chart-ah No.84 a kai a, chumi hnuah Hot 100 chart-a lang thei hla 42 a nei leh tawh a, chung zinga hla paruk chu chart top 10 a kai a, 2019 khan a hla hit ‘Bad Guy’ chu No.1 a kai tawh bawk.
A album pathumna leh a album thar ber ni bawk ‘Hit Me Hard and Soft’ chu kumin April khan a tlangzarh a, Billboard 200 (albums) chart-ah No.2 a kai a, a album hmasa pahnih, ‘When We All Fall Asleep, Where Do We Go?’ leh ‘Happier Than Ever’ te chu he chart-ah hian kar thum chhung ve ve an lo No.1 tawh bawk a ni.