BJP an thawhpui hreh vangin sum puk tur zawngin phi ruai – Dr K Beichhua
BJP an thawhpui hreh vangin
sum puk tur zawngin phi ruai
– Dr K Beichhua
ZPM sawrkarin BJP an thawhpui hreh avangin sum puk tur zawngin an phi ruai reng a, mipuia an inzawrhna an tihlawhtling hleithei lo tih BJP MLA Dr K Beichhua chuan a sawi.
Thawhtannia an party office-a inkhawmah BJP State Core Group member ni bawk Dr K Beichhua chuan ZPM sawrkar chu rethei leh harsa tak ni mah se, BJP thawhpui a hreh avangin sum puk tur zawngin an phi ruai a, thlatin mai sum an puk ta tlauh tlauh a ni, tiin, mipuia an inzawrhna an thutiam an tihlawhtling hleithei loa, kumin February 20 – Mizoram State Day-a sawhthing lei an intiamna chu chhuanlam dang an siam leh dawn nge an intiam angin an lei sak dawn tih chu an lo thlir mek tih a sawi.
Kawngpui siamthatna atan oil man an tisang a, fur laiin kawng siam theih loh chhuanlam atan sum a awm vek tawh ti siin, thal lai pawha kawng chhiat avanga harsatna kan la tawk leh mek chu a mak tih a sawi bawk
Congress party-in BJP lian tur hi an hriat lawk avang leh BJP an lian a nih chuan Congress tan din chhuah leh a harsa dawn tih an hriat avangin nasa takin an lo bei lawk a, chumi rah tha lo tak chu Mizoramin kan seng ta tih BJP MLA hian a sawi a. Tun dinhmuna BJP hlaua hnualsuat tute chu kum lama upa tawh deuh leh tunlai thil chinchang ngaihtuah thui lutuk lo deuh an ni tlangpui tih a sawi a ni.
Mizoramah Congress party-in thudik chanve pawh ni mang lo, dawt hmangin BJP an beih avangin an la hniam deuh hlek a, mah se, chutianga Congress party-in a beih lai mek chuan tuna Congress party dihmun chu kan hmuchiang tih a sawi. “Mizoramah pawh Congress party hian awngrawp lam a pan a, tunah MLA pakhat an nei a, nakin lawkah chuan gold medal la phak si loin, silver medal leh bronze medal lak hi an hna ber tur a ni tawh dawn a ni,” Dr K Beichhua hian a ti.
AAP-in Delhi mipui tana lal an duh vanga an intiamna chu mipui hnena a thlawna thil tih sak kha a ni hlawm a. Vawiinah erawh AAP tlakchhiat chhan chu corruption a ni tih sawiin, Mizorama mi tam takin an sawi dan ve thung chu, BJP-in AAP an hrek vanga tlaah an puh a, nimahse AAP hruaitupa Arvind Kejriwal chu corruption vangin a mualphova, jail-ah hial a tang tih a sawi. AAP tlak chhan chu, Delhi mipuiin an duh tawh loh vang a ni tih a sawi a ni.