BJP hi thalai hmakhaw ngaitu – BJP vice president

BJP chu thalaite hmakhaw ngaitu, an national president atan pawh kum 45 mi chauh hmang mektu an ni tih State BJP hruaitu Vanupa Zathang chuan a sawi.
Thawhtannia an party office-a ‘47th BJP Foundation Day’ an lawmnaah BJP Mizoram vice president Vanupa Zathang chuan, BJP ah mahni in leh lo, nupui fanau leh mahni chhungte aia ram hmangaih thlan vanga inpe hruaitu an neih hlawm avangin an kaihhruai sawrkar a pian hnuah nasa takin India ramah development a thleng a, tunah phei chuan Pu Modi kaihhruai sawrkar term thumna kal mek chu kawng engkimah khawvel mit fukna a lo ni ve thei ta tih a sawi.
Rem leh rem loa sakhuana nena politics chawhpawlh luih tum thinten kan ram an tichhe mek nia sawiin, “BJP beihna tur an hriat tawh loh avangin dawt hmangin mipui rilru an suk sak thin. Chu’ng mite chuan ram an hmangaih ngai loa, anmahni leh an chhungte tan leh an tangkai pui theih tur mite tana an sawrkar thin avangin kan ram pawh hian hma a sawn hleithei lo. Chuvangin tun hun hi ‘thalaite hun’ a nih angin, BJP Foundation Day vawi 47-na chauh leh BJP National president pawh kum 45 mi chauh kan neih hian thalai party leh thalai hmakhaw ngaitu party kan nihzia a langchiang hle,” a ti.