BJP hotute chetzia hian kan thawhho loh zia a pholang – MNF

BJP hotute chetzia leh khawsak phung chuan an thawh ho loh zia biakrawn an neih mekte a rawn tihchian zawk zia a pholang tih MNF chuan an sawi.
MNF Gen. Hqrs. thuchhuak chuan, tunhnaia India ram BJP hruaitute Mizoramah inthlanpui kan hmachawn turah campaign rusum an rawn thlak nasa a. Sawrkarna chang mek MNF chu vawiduai lo sawichhiain, hmelma enin an rawn en a ni ber tih a sawi. ‘Pathian leh kan ram tan titlattu, sakhaw tih bik nei MNF sawrkar kan nih zia an hrechiangin, ram leh hnam kaihhruai hna kan thawhna kawngah hnawk min ti hleah kan ngai a. India secular state hnuaiah kan sakhaw humhim tura hnam party kan nihna anga kan chetzia an hmuchiang hleah kan ngai,’ a ti.
Sakhaw zalenna hnuaiah rinna dang kalpuitute kan ramah nekchep chuang loa, zalen taka kan khawsak hona karah ram neitu rilru nena MNF-in sawrkarna a kalpui chu Hindu sakhua leh rinna tundin tum tlat BJP tan chuan a hnawk em em reng tih a sawi.
‘Sum leh hmasawnna chauh hi kan damchhan a ni loa, kan hnam leh kan sakhua a him hmasak phawt hi MNF chuan tul a tiin, chumi kawngah chuan chak takin hma a la thin a. Lak chhunzawm zel pawh a thil tum lian ber zing ami a ni,’ a ti.
Miin MNF leh BJP chu thawkdun leh inmawngzawm ang hialin sawi thin mah se, BJP hotute chetzia leh khawsak phung hian an thawhho loh zia leh an inzawm loh zia a pholang chiang hle ah an ngai tih sawiin, ‘Thawhpui an tum leh biakrawn an neih mek chu rawn bei ve hauh loin, an tan bengchheng loin, ZPM tan kawng an hawnsak mekah kan ngai,’ thuchhuah chuan a ti.