BJP-in sumin ZPM an pui tih a chiang – Congress Thalai

BJP-in sumin ZPM an pui tih a chiang
– Congress Thalai
2023 MLA inthlan dawnah BJP-in sum leh paiin ZPM an pui tih sawingamtu an tam hle tih Congress Thalai chuan an sawi.
Congress Thalai Hqrs. thuchhuak chuan, central-a BJP minister-te leh party hruaitute chuan MNF aia ZPM hmanruaa hman an duh avanga 2023 MLA inthlana sum leh paia an puih thu langsar takin an sawi a. Mizoram BJP hruaitute pawhin hei hi a dik tih an sawi thu sawichhawngin, ‘BJP thiana siam tum leh thawhpuina hming ziak (sign) an nih avangin 2023 MLA inthlan vote thlak hnaih tawh takah khan ZPM MLA candidate-te chu sum leh paiah Mizoram mipui mak tih khawpin an hnianghnar thut a. BJP-in ZPM candidate-te sum leh paia an puih avangin he sawrkar hian na taka an thil phut let lian tak an tih hlawhtlin ngam loh avangin Mizoram hi sum leh paiah hrek kan ni mek,’ a ti.
ZPM party chu danglam bik tura intiama inzuar siin, sawrkar kalsual tur vengtu tura an zawrh Val Upa Council-in MLA hlawh tihpun do tur leh tihpun a nih pawha MLA hlawh hlui la tura a ti chungin, a vaiin an la a; car pakhat chauh kawl intiam a, CM leh minister bangla cheina senso ti ve lo tura inzuarin sawrkar kal tawhte aia uchuakin mipui sum hmangin an che leh si tih a sawi a. Hei hi mipui bumna leh mipui rawkna dik tak zawk a ni tih mipuiin lo chhinchhiah turin a ngen tih a sawi.
‘Kuthnathawktute bumin kum 2023 -24 atan ZPM sawrkar hian thlai thar leina atan cheng vaibelchhe 110 a dah nia insawiin thlai lei tur zinga an sawi hmunphiah an lei loa, thlai dang leinan cheng khat pawh hman a ni lo. Kum 2024-25 ah engmah tham hman a nih loh bakah kum 2025-26 atana an sum dah pawh kuthnathawktute thlai thar leinan engmah tham hman a la ni lo bawk,’ thuchhuah chuan a ti.
ZPM chuan sawhthing pawh a intiam anga lei loin Vai ho hnenah man tlawm taka hralh lo thei lo dinhmunah kuthnathawktute an dintir mek tih a sawi a. Sawhthing hralh chhun pawh mipui bumnan a tam thei ang bera lantir tumin quintal anga sawi ngam loin a kilogram zawngin an sawi ngat ngat a. ZPM sawrkar chu kuthnathawktute lam tang ni loin kuthnathawktute dinhmun tichhetu leh mirethei rawktu sawrkar a ni tih Mizoram mipuiin an hmu mek tih a sawi bawk.
Kumin budget-ah chief minister-in tawngkam thiam taka thlai thar leina tur sum dah an intiam laiin, a department chanah nasa takin sum a dah a, kuthnathawktute department – Horticulture leh Agriculture ah sum tlem zawk an dah leh si tih Congess Thalai hian a sawi a. ‘ZPM sawrkar hian kuthnathawktute lamtang sawrkar an nih loh zia a nemnghet a, kuthnathawktute vote chiah an duhzia an pholang a ni,’ a ti.