BJP kan sawi hian politic inbeihna a ni satliah lo – Lalbiakzama

BJP chungchang sawi hian politics-a inbeihnaa ngai an awm thin a, politics inbeihna a ni satliah loa, an lama tan kan la sawimawi zel dawn a nih chuan a tawpah kan la tuar dawn tih Congress MP candidate Lalbiakzama chuan a sawi.
Lok Sabha inthlanpui atana Hnahthial leh Serchhip district lama campaign mek Congress candidate hian BJP sawrkar kal chhoh dan a zir atangin an sawrkar hnuaiah kan ram, kan hnam, kan sakhua a him loh em avangin BJP leh a thawhpuiten ro an rel lohna turin theihtawp chhuaha do turin ke a pen ve ta tih a sawi.
“Mi thenkhatin BJP chungchang kan sawi hian politics-a inbeihna angah an ngai a. Hei hi politics inbeihna a ni satliah lo. A hunlaia kan ram, kan hnam leh sakhua hi humhalh nachang kan hre lo a nih chuan kan tu leh faten min la dem dawn. A do hunlaia nasa taka kan do hi kan tih tur a ni. Nakinah awm chum chung leh ke per chunga inhrosak ringawt hian awmzia a nei dawn lo,” a ti.
2024 India ram inthlanpuiah BJP-in hnehna a chang leh a nih chuan Uniform Civil Code chu duh lo hle mah ila, min hman tir dawn niin Lalbiakzama hian a sawi. “BJP hian India ram hi ram pakhat kan nih avangin inneih leh rokhawm leh thildangah a hrang hranga tih hi a tha lo; tih dan inangtlang kan hmang tur a ni, an ti a. Chu chu BJP thil tum a nih tlat avangin Kristian leh sakhaw tenaute tan thil pawi tak a ni. UCC min hman luihpui an tum a nih chuan kan ramah thisen a luang dawn. BJP leh a lamtangte hi Kristiante hian kan do hneh ngei ngei tur a ni,” a ti.