BJP kum 11 sawrkarah India-in hma sawn chak – BJP National secretary

BJP kum 11 sawrkarah
India-in hma sawn chak
– BJP National secretary
Union minister hlui AK Antony fapa, BJP National secretary Anil Antony chuan BJP kum 11 sawrkar chhunga India ram hmasawnna leh mipui tana hna an thawh hrang hrang a sawi.
Aizawla thuthar thehdarhtute hmaa a sawi danin, kum 2014-a Prime minister Narendra Modi kaihhruai sawrkarin thuneihna a chan hnu ah kawng hrang hrangin ramin hma a sawn nasa a, PM scheme ho chu mipui, a bikin khawsak harsa zawkten an chhawr tangkai a, chu chuan ram chak leh hmasawnah India chu a siam tih a sawi.
India ramah nasa takin hna siam belh a ni a, ram chhunga thil siam chhuah tam tak kan nei thei a, India chu khawvela economy tha 4-na ah a awm thei ta tih sawiin, “Prime minister huaisen leh chak India-in kan nei hi a lawmawm a. A kaihhruaina hnuaia hmasawnna kan hmuh hian ramin hmalam hun eng tak kan nei tih a entir a ni,” a ti.
Kawngpui tha leh zau tak hmanga khaw hrang hrang inkalpawhna, in tina electric awm theihna tur, in chhunga tui thianghlim herh haw na tur pek, gas connection pek, Digital India hmanga thalaite tih hmasawnna chu Modi sawrkar ngaihpawimawh a ni a. Prime minister ngeiin khawtin hi kawngpui tha tak hmangin a inkalpawh vek tur a ni, a tih angin, vawiinah chuan chu hmathlir chu a takah chantir a ni mek zel tih Anil Antony hian a sawi a ni.
PM Modi thuneihna chan hnu leh BJP-in thuneihna a chan atangin India ramin venhimna kawngah nasa takin hma a la a. Remna duhtu ni mah se, beih a tawhnaah India chuan na tak leh hneh takin a chhanglet thin tih a sawi bawk.