BJP pianchhuahna atana mi pawimawh pual hun hmang

BJP pianchhuahna atana mi pawimawh pual hun hmang
Bharatiya Jana Sangh (BJS) party dintu, Dr Syama Prasad Mukherjee thih champha pualin BJP Mizoram chuan Thawhtanni khan an party office-ah hun an hmang.
BJP State president Vanlalhmuaka chuan East Pakistan-a West Bengal bet mai tur, India rama rin luh a nih dan, India ram state dangte anga Jammu & Kashmir India rama rin luh a nih dan leh kum 2019-a Article 370 nuaibo a nih dan, Citizenship Amendment Act neih chhoh dan chu Dr Syama Prasad Mukherjee hma lo lak tawhna leh hma a lak dan zulzuia hmalakna kalzel a nih dan a sawi a ni.
Dr. Syama Prasad Mukherjee hi Mahatma Gandhi rawtna angin Nehru khan Union Cabinet minister-ah dahin, Liaquat–Nehru Pact ah Pakistan hmaa India a tlawm tak em avangin Nehru nen ngaihdan inkalh an neih phah a, Nehru cabinet atanga bangin, 1951 October 21-ah BJP lo pianchhuahna party Bharatiya Jana Sangh a din ta tih sawiin, Dr Mukherjee hi India rama informal opposition hmasa ber a ni tih a sawi.
J&K state chungchanga Nehru leh Sheikh Abdullah inremna thuthlung, constitution hrang nei tura ruahmanna awm, J&K-in Prime minister dang an neih theih tura tih, J& K state tan flag hrang neih tir phalna chu hun lokal zelah India ram tan thil tha lo zawk a thlen dawn avangin namen loin Dr Mukherjee hian a dodal a, jail-ah dah phah niin, 1953 June 23 khan jail-ah hian thia hmuh a ni tih Vanlalhmuaka hian a sawi.
Dr Mukherjee martar-na avang hian J&K tan Prime minister dang neih, flag dang neih, J&K zin turina phalna lak ngai zawng zawng chu hemi hnu hian tih tawp a ni ta tih a sawi bawk.