BJP president-in sum harsat chhan hre lo

BJP president thar, Siaha bialtu MLA Dr K Beichhua-a’n Mizorama sum a harsat chhan a hriat phak loh thu a sawi a, BJP hnuaiah sum a tam a, chutih laiin Mizoramah sum a vang a nih chuan, a chhan a awm tur thu a sawi.
“Kan Mizoram sorkar hruaitute’n Delhi-a an zu nawr dan kan hre lo a. An tih tur an ti lo nge, an tih tur ti tho chungin an nawr chhuak lo nge kan hre lo a. An thil zu nawr hi sorkar laipui lamin an lo entertain lo nge kan hre lo,” a ti.
“Kan thenawm state-te kan en chuan, khitah an awm a ni, sum chu a awm a ni. A bikin BJP thawhpuite chu khitah an awm a ni,” a ti bawk.
A bialah pawh hmasawnna hna lian tak tak thawh a nih thu, Delhi atangin an ngaihsak thu a sawi a, “Election laia an intiamnate a ni a, election hnua thil thar ngaihtuahte a awm bawk a, fund a rawn lut tha,” a ti.
India sorkar hruaitute chungchang a sawi a, “Roreltu an nih chuan an thawhpui ni lote pawh an ngaihthah thei lo a, Mizoram pawh an ngaihthah lo ang,” a ti a, “Kan hruaitute’n fund an hmu tha lo a nih chuan a chhan a awm ang a, keini chuan kan hre phak lo a,” a ti.
Mizoramah BJP chu Kristiante hmelma anga ngaihna lian tak a awm thu a sawi a, “BJP hi Kristiante hmelma anga ngaihna lian tak a awm a, hemi kawngah hian mipui hnena thudik sawi a ngai a,” a ti a, chu chu president a nih chhunga a hmachhawp pakhat a nih thu a sawi.
BJP president a nih chhunga a thil tumah Mizo culture humhim leh inpumkhatna atana theihtawp chhuah leh Kristiante hmasawn theih nana hmalak te a tel thu a sawi.