BJP sawrkarin Mizoram Synod income tax an thing – MPCC president

BJP sawrkarin Mizoram
Synod income tax an thing
– MPCC president
Tunhnaiah central-a BJP sawrkar chuan Mizoram Synod chu income tax a rawn thing a, Synod hotute pawh central-ah income tax hotute dawrin an buai hle tih Congress hruaitu Lal Thanzara chuan a sawi.
Dampa bial by election atana a campaign-naah MPCC president Lal Thanzara chuan Income Tax department-in Mizoram Synod income tax an rawn thin thu hi sawiin, Synod-in thuchhuah siamin kohhran tin fimkhur turin a hriattir tih a sawi. Hetiang thil hi Congress kum 60 sawrkar chhung khan a thleng ngai lo tih a sawi bawk.
Union minister Goerge Kurian chuan BJP chu Kristiante tan an hlauhawm loh a, amah pawh Kristian a ni tih a sawi thu sawi chhawngin, “BJP sawrkar hnuaiah Kristian missionary-ten harsatna nasa tak an tawk mek a, missionary an nih pawh an sawi ngam tawh loa, NGO-a thawk ang ten an insawi ngam tawk a ni. RSS, Bajrang Dal, VHP-ten Kristian missionary ho an tih duhdah mek hi titawp tura hma la turin Kurian hi ka chah a ni,” a ti.
ZPM candidate thlang tling se, a nih tur an nih tawh avangin MLA fang mai a ni dawn a. Thil ropui engmah tih sak theih a neih dawn loh avangin an rel leh mai mai tur a ni a, chutiang atan chuan bial mipuiin an phal a ring lo tih MPCC hruaitu hian a sawi. MNF candidate pawh an headquarter-a an hnawl hnu, thlan tlin a nih chuan, MNF-in an buai phah mai maina tur a ni tih a sawi.
“Tun by election-ah hian Pu John Rotluangliana in thlan tlin chuan, kum 2028-ah Congress kan sawrkar ngei ka ring. 2028 ah Congress kan sawrkar chuan, thingtlang leh khawpuia mi harsate tan eizawnna bul an tanna tur NLUP kan kalpui leh dawn. Dampa bial mipui in ngaihtuahna hmang a, Pu John Rotluangliana vote turin ka ngen che u,” Lal Thanzara hian a ti.