BJP state parukin SC-ah Waqf dan thar thlawpna thlen

BJP state parukin SC-ah Waqf dan thar thlawpna thlen
Madhya Pradesh leh Assam telin BJP rorelna state parukte chuan Supreme Court-ah Waqf (Amendment) Act, 2025 chu dan mit atangin an thlawp tih an thlen.
Judge pathum – Chief Justice Sanjiv Khanna leh justice pahnih, Sanjay Kumar leh K V Viswanathan te thutna bench chuan Nilaini chawhnu dar 02:00 atang khan he dan hi dan bawhchhiatna a ni tih sawia petition hrang hrang lut chu an ngaihtuah tan a. A duh lohna thehluttu zingah hian AIMIM hruaitu, Asaduddin Owaisi pawh a tel.
Hetih lai hian BJP rorelna state – Haryana, Maharashtra, Madhya Pradesh, Rajasthan, Chhattisgarh leh Assam te chuan Waqf (Amendment) Act hi dan mit atanga thlirin a dik a, ram inenkawlna atan a tling tia an tan thu hi a hranin an thehlut veleh a ni.
A tan zawnga petition thehlut hmasa ber, Haryana chuan Waqf property-te chu a enkawl dan hmanhmawh taka en that ngei a tul zawk niin an thlen.
State sorkar hian mumal lo taka property survey te, inchhiarna mumal lo te, Waqf tribunal-a rei tak tak inhnialna awm chin fel loh te leh property inhlan dana tih dan phung mumal awm lo leh bothlau awm thin te chu dan thar hman ngei ngei a ngaihna niin an thlen.
Dan siam tharah hian Waqf enkawltu leh enkawl dan rem fel niin chumi enpuitu tur, Mutawalli pawh tihlen a ni bawk.
Maharashtra sorkar chuan court-a petition an thehluhah hian parliamentary record, committee-in a rawtna leh ram puma inrawnna siama rawt chhuah hmangin dan chu tihdanglam a ni tih an tar lang.
Waqf enkawlnaah thil langtlang zawk awminm hei hi India ram puma sakhuate taa tha zawk a nih thu an tar lang a. Waqf dan thar hian Waqf property-te enkawl leh khuahkhirhna mumal a siam niin an sawi bawk.
Rajasthan sorkar chuan hun kal tawha lo tih dan thin, property-te mi mal emaw, sorkarin emaw a lo neih leh luah thinte chu rang takin hai chhuah a ni dawn zawk niin an sawi a. Dan thar hmang hi chuan ni 90 chhung chanchinbu lianah chhuahin a neitu leh luahtu tihchian a ni zel thei tawh dawn niin an sawi.
Hetiang a nih dawn avang hian thil a langtlang a, dik takin thil kalpui a ni ang a, hnialtute tan pawh thil sawi vena remchang tam tak a inhawng dawn niin Rajasthan hian a sawi.
Chhattisgarh pawhin inawpna felfai zawk a awmna tur leh Waqf board leh tual chhung thuneitute inkara inpawhna leh thawhhona tha zawk a awm theihna tur dan thar niin an tar lang.
Sorkarin Waqf property enkawl nana digital portal an siam hmangin hnuchhui, eng nge a nih leh a sum che vel en fel a awlsam sawt dawn a, hei hian sum hman dan vel a tilangtlang ang a, a dik phah dawn niin an tarlang bawk.
Thla tira parliament in hniha pawm tak, president pawhin dana hman tura hming a ziah hnan tawh hi mi tam takin court sang berah an khing a ni.
A khingtu zingah hian Congress, Janata Dal United, Aam Aadmi Party, DMK leh CPI hruaitu eng emaw zat an tel a. Sakhaw pawl leh NGO zingah Jamiat Ulema Hind leh All-India Muslim Personal Law Board te pawh an tel bawk.