BJP State president tharatan MLA Dr K Beichhua
BJP State president thar
atan MLA Dr K Beichhua
BJP Mizoram president thar atana chuhtu awm loa tling MLA Dr K Beichhua chuan 2028 MLA inthlanah seat tam zawk an chan theihnan hma a la dawn tih a sawi.
BJP Mizoram president hi June 29 khan nomination file duh tan thehluh theih a ni a, nomination paper endik nghal niin result erawh June 30-a puan tura ruahman lawk a ni. Inthlanpui turin India ram puma BJP hmeichhe pawl hotu ber – National Mahila Morcha president Vanathi Srinivasan chu National returning officer atan a rawn kal a. Central BJP-in Mizoram vil tura an ruat Devesh Kumar leh State returning officer, BJP National Minority Morcha secretary Delson Notlia ten an puibawm.
President seat chuh tur hian MLA nilai Dr K Beichhua chuan nomination a file a, nomination file tura rin leh sawilan tel State Core Group member Lalrinliana Sailo chuan nomination hi a file ta lo thung a, midang file an awm lo bawk a ni.
Thawhtanni khan president thar hi a hranpaa puan a ni a. Chuhtu awm loin Dr K Beichhua hi tlinga puan a ni.
BJP State president thar chuan a thil tum zingah Mizo nunphung vawnnun tlat, Mizo inpumkhatna tih that zel leh grassroot atanga tan a, an party-in unit tam zawk an neihna atan hma lak a tum tih a sawi. Kil hrang hranga an member-te thurawn a la dawn tih sawiin, chu chuan inlungrualna a hring chhuak anga, party a tichak dawn tih a sawi a ni.
BJP chu Kristian-te tiduhdahtu leh hnam leh sakhaw tlem zawkte hnuhhniam tumtu anga chhuah an ni fo chu a diklo tih Dr K Beichhua hian sawiin, hei hi a nih loh zia Mizo mipui hrilhfiah a tul tih a sawi. PM Modi-a’n ram hmasawnna tura a hmathlir a tihhlawhlin mek dan mipui an hriatfiah tir phawt chuan inthlan leh hunah MLA tam zawk an neih a ring, tiin, BJP-ah mitha an luh belh dawn tih a sawi bawk.
BJP hian state president an thlang thin a, a ni hian vice president 6 aia tam lo, hmeichhia pakhat tel ngeiin a ruat thei. General secretary pahnih thleng a ruat thei a, secretary 6 thleng a ruat thei bawk. Treasurer erawh central lam ruat a ni a, treasurer hi chu party OB ah chhiar tel an ni chiah lo niin thu dawn a ni.