BJP ten South India-ah seat 130 awmah 15 lak tlin ring lo
Telangana Chief Minister Revanth Reddy chuan Bharatiya Janata Party te chuan South Indian voter te vote an nei dawn lo tia sawiin Lok Sabha seat 130 awmah seat 15 aia tlem an la chauh ang a ti.
Kum 2024 Lok Sabha inthlan turah BJP te chuan southern states ah beihpui an thlak a, a bik takin Kerala leh Tamil Nadu-ah a ni zual a. Prime Minister Narendra Modi pawhin vawi duai lo a tlawh tawh a ni.
Nikum Assembly inthlana BJP leh BRS te laka chakna chang Reddy chuan INDIA block chuan southern states a seat 130 awmah seat 115 atanga 120 an lak a rin thu a sawi bawk a.
“Chhim lamah seat 130 a awm a, BJP te hian seat 12-15 bak an la lovang. A dang zawng chu INDIA bloc in an chang ang” tiin Congress candidate Adoor Prakash tana Kerala a Attingal a campaign puitu Reddy chuan a sawi.
Prakash chu MP ni lai mek niin State a seat dang ang bawkin Attingal seat pawh Congress leh CPIM tena an inlakchhawk thin a ni a, BJP te chu hniam takah pathumnaah an awm thin.
BJP te chuan Kerala-ah Lok Sabha seat lak an la nei ngai miah lo va, Assembly inthlanah pawh seat khat chauh an la bawk.
Reddy chuan INDIA bloc chuan Kerala a Lok Sabha seat 20 chu an lak vek a rin thu a sawi a. “Kumin phei hi chuan BJP te hian an deposit an chawi ang” tiin Telangana Chief Minister chuan a sawi bawk.
Kum 2019 inthlanah khan Congress leh an thawhpuite chuan chakna an chang hneh hle a, BJP te chu tlemin an vote share a pung hret tih chauh a ni.
Mahse, kuminah erawh CPIM leh Congress te chuan seat insemah inlungrualna an neih theih loh avangin an inbei ta a, anni bakah BJP te an awm bawk.
Telangana-ah chuan INDIA bloc chuan Lok Sabha seat 17 atangin seat 14 an lak a rin thu Reddy chuan a sawi bawk a. Nikum Assembly inthlanah Congress te chuan seat 119 awmah 64 an la a ni.
BJP te chuan kumin inthlanah Lok Sabha seat 400 lak tumin ‘Mission South’ an kalpui a, an bei nasa hle. I
Inthlan hmasak zawk khan BJP te chuan Puducherry, Tamil Nadu, Andra Pradesh leh Kerala-ah seat khamah an la lo va, Telangana ah seat li an la thung. Karnataka-ah erawh seat 28 awmah 25 an la thung a ni.