BLA-in rel an beih atangin mi 300 chuang chhan chhuak

BLA-in rel an beih atangin mi 300 chuang chhan chhuak
Pakistan-a sipaite chuan Thawhlehnia Balochistan province-a helhovin rela an hren mi 300 chuang an chhan chhuak tih an sawi.
Sipai thupuangtu chuan beihpui thlaknaah hel 33 thah an ni tih a sawi.
Beihpui thlak tan a nih hmain Baloch Liberation Army (BLA) chuan civil mi 21 leh sipai pali an thah bawk tih a sawi.
Sipaite hian a chhehvelah hlauhawm a la awm takin tih thu-ah zawn beihpui an thlak chhunzawm bawk.
Relah hian beih a nih lai hian mi 440 vel an chuak niin sipai thupuangtu chuan a sawi.
Sipaite hian rela chuang zinga mi, helhovin an thunun laia tlan chhuaka a hmun tlanchhiatsante zawn hna an thawk mek bawk.
Pakistani thuneitute bakah UK leh US telin khawthlang ramte chuan BLA hi firfiak pawla an chhal a ni.
BLA hi Pakistan-a province lian ber, Balochistan-in mahnia inrelbawl hranna tam zawk emaw, indan emaw nawrtu an ni.
Islamabad chuan an province-a leilung hausakna an chhawr em em laiin anmahni ber an ngaihthah niin an sawi a. Tun hma lam pawhin sipai camp, rel station leh rel beih an ching a, tun hi rel an hijack vawi khatna a ni thung.
Thuneitute chuan rela chuang zingah hian venhim hna thawktu 100 vel an tel niin an sawi.
Helho hian thuneituten Baloch political prisoner-te darkar 48 chhunga chhuah an nih loh chuan an mi hrente an that dawn niin an sawi tih tual chhung chanchinbute chuan an tar lang.
An beih laihian rel kawng thenkhat chu an bomb chhia a, tlanga leiverh bulah an kap bawk.
Thuneitute chuan a hmun hi internet leh mobile-in a tuam phak loh lai a nih avangin mi chuangte biakpawh an theih loh niin an sawi.
Thawhlehni thim hlim khan passenger thenkhat chu chhuahin kein darkar li dawn an kal hnuah rel station dawt leh an thleng.
An zinga mi, Quetta atanga Lahore-a a chhungte tlawh tura zin, Muhammad Ashraf chuan, “Harsa takin station hi kan thleng a, hmeichhia leh naupangte nen kan nih avangin kan hah tak zet a ni,” a ti.
Helicopter leh sipai za tel hmangin mi hrente chhanchhuah tuma beih a ni a. Nilaini tukah khan mi 100 chuang chhuah leh an ni.
Helhovin rel an thunun chhung hi darkar 30 chuang a ni.
Sipai thupuangtu chuan a titute hi lakah hian dan hmanga dikna hlen chhuah ngei a ni ang tih a sawi.