BLACK LIVES MATTER:
Floyd-a hriat rengna hun hmang
American-te chuan police-in an thah, George Floyd-a thih cham kum nganaah amah hriat rengna hun an hmang a, a sei lenna khawpui leh a thihna khawpuiah chuan a pualin pun khawm an huaihawt.
Mi hang, Floyd-a hi Minneapolis-ah police officer Derek Chauvin-a’n thatin ram puma chi inthliarna duh lohna leh police chetna rawng lutuk duh lohna lantir zui a ni.
Pathianni khan Floyd-a chhungte chu Houston bula Floyd-a thlanah pung khawmin Rev. Al Sharpton-a’n a kaihruai a, Minneapolis-ah pawh hriat rengna hun hman a ni.
Mi tam tak chuan Floyd-a thihna kha an rama chi inthliarnaa harh tharna thlentuah an ngai a ni.
Minneapolis-ah chuan vantlangin biak ina inkhawm huaihawtin zanah Floyd-a hriat rengna pualin gospel concert an huaihawt.
He hun hi kum tina Floyd-a thahna hmun, George Floyd Square tia a hming an vuaha Rise and Remember Festival an hman thin peng pakhat a ni.
Floyd-a sei lenna an phumna, Houston-ah chuan tual chhung miten poetry session te, musical performance leh tual chhung pastor-te thu sawi hunte an buatsaih bawk.
Floyd-a hi kum 2020 khan police-in Minneapolis-ah an man a, mi ngo police officer Chauvin-a chuan a nghawngah minute kua aia rei a thingthit a ni.
A thihna hi a bula miin phone camera-in a lo la a, khawvel pumah darhin vun rawng avanga inen hranna duh lohna leh police chet dan rawng lutuk duh lohna lantirna lian tak a chhuah phah.
Chauvin-a hi kum 46 mi a thah avangin kum 22 tang tura hrem a ni a. Officer dangte pawh he thihna thleng thei an lo ven loh avangin hrem an ni bawk.
Floyd-a thihna avanga lungawi lohna lantir kha ‘Black Lives Matter’ tia sawi zui a ni a. Tun hnaia ngaihdan lak khawmah American eng emaw zat chuan mi hangte nunah hmasawnna tlem hmuh tur a awm ve tawh an ti a. Hetih lai hian May thlaa Pew Research Center-in an thil hmuh an tihchhuahah an zawhna chhangtu 72% chuan inthlak danglamna a awm tak tak lo niin an sawi thung.
American-ten June, 2020-a Floyd-a thih hnu kum ngaah Black Lives Matter movement an thlawpna chu 15%-in a tlahniam tawh bawk.
BLACK LIVES MATTER: Floyd-a hriat rengna hun hmang
Get real time updates directly on you device, subscribe now.