Substation hal vang nia hriatin France-ah power awm lo

Substation hal vang nia hriatin France-ah power awm lo
French Riviera region-ah ni hniha a vawi hnih nan Nice-a substation a kan avangin power supply a awm lo leh a, thuneitute chuan tuten emaw tihluiha an hal ngei a nih an ring.
Pathianni zing dar 02:00 (India-a zing dar 6:30) vel atang khan chhungkaw 45,000 velin kangmei chhuak avang hian power supply an dawng lo va, a hma ni chiah khan Cannes bula hal luih ni ngeia hriata substation kang vangin a lo awm lo tawh bawk.
Nice-a police-te chuan khawpui khawthlang lama substation bulah lirthei ke hnuhma an hmu a, a kawngka tihchhiat a ni bawk niin an sawi tih tual chhung chanchinbute chuan an sawi.
Nice Airport, tramway network leh an thenawma Saint-Laurent-du-Var leh Cagnes-sur-Mer khuaa chengte chuan Pathianni tuka tihthat leh a nih hma zawng power an nei lo a ni.
Nice Mayor Christian Estrosi chuan he thil thleng hi a dem thu leh ‘pawi khawihna mawl takin kan ram a tibuai’ tiin X-ah a tar lang.
Deputy Mayor Gaël Nofri chuan substation kang hi ‘mi sual tute emaw tih atanga intan’ nia an hriat thu a sawi bawk.
Cannes-ah chuan international film festival neih lai takin power hi an nei lo va. Thuneitute chuan substation hal vang niin an sawi.
Khawpui leh a chhehvela chhungkaw 1,60,000 chuangin power hi an nei lo niin an sawi.
Zing lama power awm lo avang hian film chhuah tur tam tak a tibuai a, festival huaihawttute chuan mi mal generator hawhin an kaltlangpui thei hram a ni.
Tun thleng hi chuan khawpui lian pahniha substation kang hian inzawmna a neih an la hre lo va. Estrosi chuan thuneituten Nice-a electric hmunah venhimna tha zawk an pe nghal tih a sawi a, chhui nghal a nih thu a sawi bawk.
Nice prosecutor Damien Martinelli pawhin chhui nghal a nih thu AFP news agency hnenah a sawi bawk.